काठमाडौं : राष्ट्रिय निकुञ्जका कुनै पनि वस्तु बिनाअनुमति कसैले लैजान पाउँदैन । यस्तै संवेदनशील क्षेत्र सगरमाथा राष्ट्रिय निकुञ्जबाट केही आरोहीले ढुंगा बोकेर ल्याउँदा अहिले कानुनी झमेलामा परेका छन् । हिमाल आरोहण गरेर काठमाडौं फर्किंदै गरेका तीन जनालाई सगरमाथा क्षेत्रको ढुंगो बोकेर ल्याएको आरोपमा आइतबार बिहान नियन्त्रणमा लिएको छ ।
हुन त उनीहरूले चिनोका लागि भनेर पनि ढुंगा ल्याएको हुनसक्छ तर ‘कानुनको अनभिज्ञता क्षम्य हुँदैन’, यो कानुनको सिद्धान्त हो । कानुन जानेको छैन भन्दैमा उसलाई सजायमा छुट हुँदैन । त्यसैले हरेक मान्छेले कानुन जानेको हुन्छ भनेर कानुनले व्याख्या गरेको हुन्छ । अझै संरक्षित क्षेत्रको विषय झन् संवेदनशील बन्न पुग्छ ।
आइतबार पक्राउ पर्नेमा ४० वर्षीय पेम्बा शेर्पा, ३० वर्षीय पुर्वा शेर्पा र अमेरिकी नागरिक सोफिया हेलर रहेको त्रिभुवन अन्तर्राष्ट्रिय विमानस्थल प्रहरीले जनाएको छ । उनीहरूलाई सानो आकारका १२ वटा ढुंगा र झण्डै एक किलोको अर्काे ढुंगा ल्याएका थिए । सोलुखुम्बूबाट आएको सूचनाका आधारमा विमानस्थल प्रहरीले खानतलासी गर्दा उनीहरूको साथबाट ढुंगा बरामद गरिएको हो ।
वन क्षेत्रको विषय भएकाले आवश्यक अनुसन्धान र कार्बाहीका लागि डिभिजन वन कार्यालय काठमाडौंलाई बुझाइएको विमानस्थल सुरक्षा कार्यालयका वरिष्ठ प्रहरी उपरीक्षक सन्दीप भण्डारीले जानकारी दिए ।
कार्यालयका डिभिजनल वन अधिकृत रामबाबु पौडेलले संरक्षित क्षेत्रबाट बिना अनुमति कुनै पनि वस्तुहरू निकासी गर्न नपाइने बताए । यस्तो भएमा राष्ट्रिय निकुञ्ज तथा वन्यजन्तु संरक्षण ऐनअनुसार कार्बाही हुने उनले जानकारी दिए । उनीहरूको विषयमा थप अनुसन्धान भइरहेको पौडेलले बताए । -रासस
प्रकाशित मिति: सोमबार, जेठ १३, २०७६
-1732776560.jpg)
