काठमाडौं । नेपाल कम्युनिष्ट पार्टी (एमाले) का महासचिव शंकर पोखरेल ले अराजक गतिविधि र राष्ट्रिय प्रतीकमाथिको आक्रमणलाई कडा शब्दमा निन्दा गरेका छन्। उनले अराजकता र उदण्डतालाई कुनै पनि अर्थमा “नयाँपन” वा “परिवर्तनको संकेत”का रूपमा व्याख्या गर्न नसकिने स्पष्ट पारे।
महासचिव पोखरेलले सामाजिक सञ्जालमार्फत आफ्नो धारणा सार्वजनिक गर्दै भने, “अराजकता र उदण्डता कुनै नयापन होइनन्, ती अपराध हुन्। झण्डा जलाएर अरूको आस्थामा चोट पुर्याउनेहरू सम्मानका हकदार हुन सक्दैनन्।”
उनले लोकतान्त्रिक व्यवस्थामा असन्तुष्टि र विरोध व्यक्त गर्ने संवैधानिक तथा शान्तिपूर्ण माध्यमहरू प्रशस्त रहेको उल्लेख गर्दै उग्र र असहिष्णु गतिविधिले लोकतन्त्रलाई कमजोर बनाउने बताए। “विचार र असहमति लोकतन्त्रको मूल आत्मा हो, तर त्यसका नाममा राष्ट्रिय प्रतीकको अवमानना गर्नु न कानुनी रूपमा उचित हो, न नै नैतिक रूपमा स्वीकार्य,” उनले उल्लेख गरे।
महासचिव पोखरेलले पछिल्ला समय केही समूहबाट देखिएका उग्र गतिविधिप्रति संकेत गर्दै यस्ता तत्वहरूलाई जनताले निर्वाचनमार्फत अस्वीकार गर्ने दाबी गरे। “लोकतन्त्रमा अन्तिम निर्णायक शक्ति जनता हुन्। अराजक सोच बोकेर अघि बढ्नेहरूलाई जनताले मतमार्फत उचित जवाफ दिनेछन्,” उनको भनाइ छ।
उनको अभिव्यक्तिलाई राजनीतिक वृत्तमा अर्थपूर्ण रूपमा हेरिएको छ। विश्लेषकहरूका अनुसार राष्ट्रिय एकता, सहिष्णुता र संवैधानिक मर्यादाको विषयमा प्रमुख दलका नेताबाट आएको यस्तो धारणा आगामी राजनीतिक बहसमा प्रभाव पार्न सक्ने देखिन्छ।
प्रकाशित मिति: शुक्रबार, फागुन ८, २०८२
