काठमाडौं । केपी शर्मा ओलीले भदौ २४ गते भएको आगजनी तथा तोडफोडका घटनालाई ‘राष्ट्रविरुद्धको महाअपराध’को संज्ञा दिएका छन्।
बिहीबार नेकपा (एमाले)को चुनावी घोषणापत्र सार्वजनिक कार्यक्रममा सम्बोधन गर्दै उनले उक्त घटना योजनाबद्ध र पूर्वानुमानित रहेको दाबी गरे। “भदौ २४ को महाविनाश अप्रत्यासित थिएन,” उनले भने।
ओलीले त्यस घटनामा संलग्न व्यक्तिहरू अहिले आफूलाई ‘नयाँ शक्ति’का रूपमा प्रस्तुत गर्दै आएको आरोप लगाए। राष्ट्रविरुद्ध गरिएको अपराध ढाकछोप गर्न राजनीतिक आवरण प्रयोग भइरहेको उनको भनाइ थियो।
“राष्ट्रका विरुद्धको महाअपराध छोप्न केहीले नयाँ शक्तिको मुखुण्डो लगाएका छन्। यस्ता तत्वलाई चिन्न ढिलो गर्नु हुँदैन,” उनले चेतावनी दिए।
उनले पार्टीका नेता–कार्यकर्तालाई सचेत रहन आग्रह गर्दै देशको स्थायित्व र सुरक्षाका विषयमा कुनै सम्झौता नगर्ने बताए।
प्रकाशित मिति: बिहीबार, फागुन ७, २०८२
