काठमाडौं । गगन थापाले सहकारी, मिटरब्याज र लघुवित्त क्षेत्रमा देखिएको ठगी र अव्यवस्थाविरुद्ध कडा कदम चाल्ने बताएका छन्। जनकपुरमा आयोजित पार्टी सभालाई सम्बोधन गर्दै उनले मधेश प्रदेशमा वित्तीय अराजकता फैलिएको उल्लेख गर्दै यसलाई अन्त्य गर्न ठोस पहल आवश्यक रहेको बताए।
थापाले भने, “सहकारीका ठगहरूलाई तह लगाउने मात्रै होइन, मिटरब्याज र लघुवित्तका नाममा सर्वसाधारणलाई शोषण गर्नेहरूलाई पनि कानुनी दायरामा ल्याउँछौँ। मधेशमा अब वैकल्पिक र विश्वसनीय वित्तीय संरचना निर्माण गर्नुपर्छ।” उनका अनुसार, वित्तीय पहुँचको अभाव र नियमन कमजोर हुँदा सर्वसाधारण उच्च ब्याजदर र ठगीको जालमा फसेका छन्।
उनले मधेशका किसान, मजदुर, साना व्यवसायी तथा विपन्न समुदाय सबैभन्दा बढी प्रभावित भएको उल्लेख गरे। “सहकारीमा बचत राख्ने आमनागरिकको पसिना र आशामाथि खेलवाड गर्नेहरूलाई उन्मुक्ति दिइँदैन,” उनले चेतावनी दिए।
थापाले मधेशमा आर्थिक असमानता र सामाजिक विभेद गहिरिँदै गएको टिप्पणी गर्दै दलित, अल्पसङ्ख्यक, महिला र युवा समुदायलाई केन्द्रमा राखेर नयाँ नीतिगत हस्तक्षेप आवश्यक रहेको बताए। “मधेशका दलित, अल्पसङ्ख्यक र महिलाका लागि अवसरको ढोका खोल्ने नयाँ सोच लिएर आएको छु,” उनले भने।
उनले मधेशमा लागूऔषध दुव्र्यसनको समस्या बढ्दो रहेको भन्दै यसलाई सामाजिक तथा स्वास्थ्य संकटका रूपमा हेर्नुपर्ने धारणा राखे। “युवालाई रोजगारी, सीप र खेलकुदतर्फ आकर्षित नगरेसम्म दुव्र्यसन नियन्त्रण हुँदैन,” उनले भने।
खेलकुद पूर्वाधार विकासलाई पनि प्राथमिकतामा राख्ने प्रतिबद्धता व्यक्त गर्दै थापाले मधेशमा अन्तर्राष्ट्रियस्तरको क्रिकेट रङ्गशालासहित आवश्यक खेल संरचना पाँच वर्षभित्र निर्माण गर्ने लक्ष्य रहेको बताए। “खेलकुद केवल मनोरञ्जन होइन, युवाको ऊर्जा र पहिचान निर्माणको माध्यम हो,” उनले उल्लेख गरे।
सम्बोधनका क्रममा उनले मधेशको विकासका लागि केवल भाषण नभई कार्ययोजना आवश्यक रहेको बताए। वित्तीय सुधार, सामाजिक न्याय, युवा सशक्तीकरण र पूर्वाधार विकासलाई एकसाथ अघि बढाउनुपर्ने उनको जोड थियो।
कार्यक्रममा स्थानीय नेता–कार्यकर्ता तथा सर्वसाधारणको उल्लेख्य उपस्थिति रहेको थियो। थापाको सम्बोधनलाई मधेशको वित्तीय संकट र सामाजिक चुनौतीप्रति केन्द्रित राजनीतिक सन्देशका रूपमा हेरिएको छ।
प्रकाशित मिति: बुधबार, फागुन ६, २०८२
