काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले वर्तमान राजनीतिक अवस्था र चुनाव प्रक्रियाप्रति गम्भीर चिन्ता व्यक्त गरेका छन्। सुनसरीको चक्रघट्टीमा आयोजित चुनावी सभालाई सम्बोधन गर्दै उनले ०८४ मा हुनुपर्ने चुनावलाई ०८२ मै गराउन खोजिएको उल्लेख गर्दै यसबाट मुलुकका मूल समस्या समाधान नहुने दाबी गरे।
लिङ्देनले जबरजस्ती चुनावतर्फ धकेलिँदा केही समयका लागि समस्या टरेजस्तो देखिए पनि पछि अवस्था झन् जटिल र भयावह बन्न सक्ने चेतावनी दिए। “यही व्यवस्था ठीक छ भनेर जबरजस्ती चुनाव गराइयो भने देश दुर्घटनातर्फ जान सक्छ,” उनले भने।
उनले देशमा कुनै पनि पक्षले आफूलाई निषेधित महसुस नगर्ने वातावरण निर्माण गर्नुपर्ने आवश्यकता औंल्याए। राजा, राजनीतिक दल र नयाँ पुस्ताबीच व्यापक समझदारी कायम नगरी चुनावमा जाँदा त्यसले दीर्घकालीन निकास नदिने उनको भनाइ थियो।
प्रजातन्त्र दिवसका अवसरमा पूर्वराजा ज्ञानेन्द्र शाहले दिएको सन्देशलाई सुझावका रूपमा लिनुपर्ने बताउँदै लिङ्देनले सबै राजनीतिक दललाई त्यसलाई सकारात्मक ढंगले ग्रहण गर्न आग्रह गरे। देशलाई केन्द्रमा राख्दै ‘नेपाल प्रथम, नेपाली प्रथम’को भावनासहित नयाँ सहमति आवश्यक रहेको उनले उल्लेख गरे।
आगामी निर्वाचनलाई देशको भविष्यसँग जोडिएको विषय भन्दै उनले सामाजिक सञ्जालको प्रभावमा नपरी गम्भीरतापूर्वक निर्णय गरेर मतदान गर्न मतदातालाई आग्रह गरे। समस्या व्यक्ति मात्र नभई व्यवस्थासँग पनि जोडिएको दाबी गर्दै उनले व्यवस्था परिवर्तनको आवश्यकता औंल्याए।
प्रकाशित मिति: बिहीबार, फागुन ७, २०८२
