काठमाडों : सुदूरपश्चिम प्रदेश सरकारका मन्त्रालयहरूले अनुगमन र भ्रमणमा मात्र करोडौँ खर्च गरेको बाहिरिएको छ । मन्त्रालयहरूले चालु आर्थिक वर्षको १० महिनाको अवधिमा अनुगमन र भ्रमणमा साढे तीन करोडभन्दा बढी रकम खर्च गरेको जनाइएको हो ।
प्रदेशको आर्थिक मामिला तथा योजना मन्त्रालयले अनुगमन भ्रमण शीर्षकमा विनियोजन गरिएको ४५ लाखमा ४४ लाख ३३ हजार रुपैयाँमा १० महिनामा नै खर्च गरेको छ । अहिलेसम्म थप ८ लाख ७७ हजार खर्च भएको छ।
आर्थिक मामिला तथा योजना मन्त्री झपट बोहराले भने अनुगमन र भ्रमणपछि धेरै सुधार भएको दाबी गरेका छन् ।
सुदूरपश्चिम प्रदेशसभा सदस्यहरू, प्रदेशसभा सचिवालयका कर्मचारी तथा विभिन्न विषयगत समितिका पदाधिकारीहरूले पनि चालु आर्थिक वर्षमा ४८ लाख ७७ हजार अनुगमन भ्रमणका लागि खर्च गरेका छन्।
मुख्यमन्त्री तथा मन्त्रिपरिषदको कार्यालयले १६ लाख १४ हजार बढी बजेट सकेको बताएको छ भने अन्य मन्त्रालयको औसतमा ४० देखि ५० लाख अनुगमन र भ्रमणका लागि खर्च भएको छ ।
भौतिक पूर्वाधार विकासमन्त्री पठानसिंह बोहराले योजना कार्यान्वयन भइरहेकाले अनुगमन आवश्यक देखिएको र अवलकोलन भ्रमणले पनि धेरै कुरा सिकाउने जानकारी दिए ।
मन्त्रीहरूको जिल्ला भ्रमण, कर्मचारीको सरुवा, मन्त्रीको निजी सचिवालयका कर्मचारीले विभिन्न ठाँउको भ्रमणमा यो रकम सकेका जनाइएको छ ।
प्रकाशित मिति: बिहीबार, जेठ ९, २०७६
-1732776560.jpg)
