डोटी : जिल्लाका नौ स्थानीय तहले डेढ वर्षको अवधिमा गाडी खरिदमा झण्डै ११ करोड रुपैयाँ खर्च गरेका छन् । स्थानीय तहको निर्वाचन भइसकेपछि विसं २०७४ साउनदेखि विसं २०७५ चैतसम्मको अवधिमा १० करोड ९३ लाख ८६ हजार आठ सय २९ गाडी खरिदमा खर्च गरेका छन् ।
गाडी खरिदमा सबैभन्दा धेरै खर्च पूर्वीचौकी गाउँपालिकाले गरेको पाइएको छ । नगरपालिकाभन्दा यहाँका गाउँपालिकाले गाडी खरिद बढी गरेका छन् । जिल्लाका अधिकांश स्थानीय तहसँग एक्साभेटर र डोजर छन् । कतिपय किन्ने तयारीमा छन् । तर, डोजर प्रयोगको नीति नियम पालना भएको छैन ।
पूर्वीचौकीले हालसम्म दुई करोड ६७ लाख ५५ हजार छ सय ५२ रुपैयाँ विभिन्न सवारी साधन खरिदमा खर्च गरेको छ । दस मोटरसाइकल खरिदमा २४ लाख ९७ हजार दुई सय रुपैयाँ खर्च भएको छ । त्यस्तै ३७ लाख २० हजारमा पिकअप जीप, एक करोड २३ लाख ६२ हजार चार सय ५० एक्साभेटर खरिद गरिएको छ । यसैगरी ८१ लाख ७६ हजारमा दुईवटा बस पनि सो गाउँपालिकाले किनेको छ ।
शिखर नगरपालिकाले एक करोड ५४ लाख २९ हजार तीन सय खर्च गरेर विभिन्न गाडी किनेको पाइएको छ । दुई नगर बसमा ५६ लाख ६० हजार, टिपरमा ३८ लाख ६९ हजार, जीपमा ३६ लाख ९५ हजार, आठ मोटरसाइकल खरिदमा २० लाख २६ हजार चार सय र एउटा स्कुटरमा एक लाख ७८ हजार नौ सय रुपैयाँ खर्च गरेको देखिएको छ ।
दिपायल सिलगढी नगरपालिकाले एक करोड छ लाख ८७ हजार चार सय ८९ रुपैयाँमा गाडी खरिद गरेको छ । उक्त नगरपालिकाले ३४ लाख आठ हजार छ सय ५० मा १५ मोटरसाइकल खरिद गरेको पाइएको छ । त्यस्तै दुई नगर बसमा ५१ लाख ९० हजार, एउटा ट्याक्टरमा १६ लाख ३८ हजार आठ सय ८४ र सक्सनम ट्यांकमा चार लाख ५० हजार खर्च गरेको छ ।
बडीकेदार गाउँपालिकाले विभिन्न गाडी खरिदमा एक करोड ८१ लाख ७९ हजार एक सय खर्च गरेको छ । सो गाउँपालिकामा एक करोड २० लाखमा एउटा सडक खन्ने एक्साभेटर, ३८ लाख ७० हजारमा एउटा पिकअप जीप र २३ लाख नौ हजार एक सयमा नौ मोटरसाइकल खरिद गरिएको छ ।
त्यस्तै सायल गाउँपालिकाले गाडी खरिदमा एक करोड ५६ लाख १६ हजार दुई सय रुपैयाँ खर्च गरेको पाइएको छ । सो गाउँपालिकाले सात लाख ४६ हजार दुई सयमा तीन वटा मोटरसाइकल खरिद गरेको छ । यस्तै महिन्द्रा बोलेरो जीपमा २३ लाख ८५ हजार र एक्साभेटरमा एक करोड २४ लाख ८५ हजार रुपैयाँ खर्च गरेको देखिएको छ ।
केआई सिंह गाउँपालिकाले सबैभन्दा धेरै १७ वटा मोटरसाइकल खरिद गरेको छ । मोटरसाइकल खरिदमा ३२ लाख ६९ हजार एक सय १५ खर्च भएको छ । यस्तै मिनी टिपरमा २० लाख १३ हजार दुई सय ७४ र जेसिबी खरिदमा ४० लाख ९९ हजार नौ सय ९९ गरी कूल ९३ लाख ८२ हजार तीन सय ८८ खर्च भएको छ ।
बोगटान गाउँपालिकाले ७६ लाख १३ हजार आठ सय गाडी खरिदमा खर्च गरेको छ । उक्त गाउँपालिकाले चार मोटरसाइकल खरिदमा नौ लाख ७८ हजार आठ सय खर्च गरेको छ । यस्तै डोजर खरिदमा ४२ लाख ५० हजार र महिन्द्रा बोलेरो जीप खरिदमा २३ लाख ८५ हजार खर्च भएको देखिएको छ ।
जोरायल गाउँपालिकाको गाडी खरिदमा अन्यको स्थानीय तहभन्दा तुलनात्मक रूपमा खर्च कम भएको देखिएको छ । उक्त गाउँपालिकाले ५८ लाख ३८ हजार नौ सय ९९ गाडी खरिदमा खर्च गरेको देखिन्छ । जोरायलले १० वटा मोटरसाइकल खरिदमा २२ लाख आठ हजार नौ सय ९९ खर्च गरेको छ । यसैगरी एउटा महिन्द्रा पिकअप जीपमा ३६ लाख ३० हजार खर्च गरेको छ ।
आदर्श गाउँपालिकाले ५७ लाख २२ हजार नौ सय रुपैयाँका गाडी खरिद गरेको छ । १४ मोटरसाइकल खरिदमा ३३ लाख ३७ हजार नौ सय र एउटा महिन्द्रा बोलेरो जीप
खरिदमा २३ लाख ८५ हजार खर्च देखाइएको छ । स्थानीय तहले खरिद गरेका दुई पांग्रे सवारी साधनको मूल्यमा एकरुपता देखिएको छैन । एउटै कम्पनीको एउटै मोडलका र एउटै क्षमताका मोटरसाइकल पनि फरक–फरक दरमा खरिद गरिएको पाइएको छ । –रासस
प्रकाशित मिति: मंगलबार, जेठ ७, २०७६
-1732776560.jpg)
