काठमाडौं : सरकारले जारी गरेको सार्वजनिक खरिद नियमावलीले नेपाली निर्माण व्यवसायीहरूलाई व्यवसायबाट विस्थापित गर्ने भन्दै त्यसविरुद्ध आन्दोलनमा जाने नेपाल निर्माण व्यवसायी महासंघले घोषणा गरेको छ ।
स्वदेशी निर्माण व्यवसायीहरूलाई पेसाबाटै पलायन गर्ने गरी जारी भएको नियमावलीका केही बुँदाप्रति महासंघको गम्भीर ध्यानाकर्षण भएको भन्दै आपत्ति प्रकट गरेको छ ।
महासंघ लगायत यससँग प्रत्यक्ष संलग्न सरोकारवाला निकायको राय सुझावलाई बेवास्ता गर्दै जारी भएको नियमावलीका केही बुँदाले स्वदेशी व्यवसायीलाई पेसाबाटै विस्थापित गर्ने र विदेशी व्यवसायीहरूलाई प्राथमिकता दिइएको महासंघले आरोप लगाएको छ ।
मुलुकभरका १५ हजार पाँच सयभन्दा बढी व्यवसायीहरूको छाता संगठनको रुपमा रहेको महासंघले दिएका सुझावलाई बेवास्ता गर्दै एकतर्फी रुपमा सकारले नियमावली ल्याएको भन्दै महासंघले आन्दोलनमा जाने चेतावनी दिएको हो ।
सरकारले लिएको समृद्ध नेपाल सुखी नेपालीको नारालाई साकार रुप दिन पनि पूर्वाधार निर्माण महत्वपूर्ण हुने तर जारी गरिएको नियमावली बमोजिम कोही पनि व्यवसायीले टेन्डरमा सहभागी हुन नपाउने भएकाले विरोधमा जानुको विकल्प नरहेको महासंघले जनाएको छ ।
नियमावलीका सन्दर्भमा सरोकारवालाहरूसँग महासंघ घनीभूत छलफलमा रहेको उल्लेख गर्दै यसविरुद्ध आन्दोलमा जाने महासंघले चेतावनी दिएको छ । भर्खरै सरकारले सार्वजनिक गरेको सार्वजनिक खरिद नियमावलीमा कुनै पनि मुद्दाको किनारा नलागेसम्म व्यवसायीलाई अर्को टेन्डरमा सहभागी हुन नपाउने प्रावधान समेटिएको छ ।
प्रकाशित मिति: आइतबार, जेठ ५, २०७६
-1732776560.jpg)
