१९ चैत, काठमाडौँ । नेपालीसँग भएका पुराना ५ सय र १ हजार दरका भारु नोट नसाटिने भएको छ । कुनै आश्चर्यजनक निर्णय नभएमा अब पुराना भारु नसाटिने निश्चित भएको छ । शुक्रबारसम्म नेपाल राष्ट्र बैंकले प्रतिबन्धित नोट सटहीबारे पत्राचार नगरेपछि यो अवस्था आएको हो । भारतबाट नोट सटहीमा छलफल गर्न आएको भारतीय रिजर्भ बैंकको टोलीले नोट सटहीबारे शुक्रबारसम्म जानकारी गराउन भने पनि राष्ट्र बैंकले सटही हुने पैसाको सीमा भारतले निकै कम राखेपछि पत्राचार नगरेको जनाएको छ । भारतले प्रतिव्यक्ती ४५ सय रुपैयाँसम्म सटही गर्ने प्रस्ताव गरेपछि नेपालले त्यसलाई अस्वीकार गरेको छ । नेपालले २५ हजारसम्म सटही गर्न प्रस्ताव गरेको थियो । नेपालमा झण्डै २०देखि २५ अर्ब प्रतिबन्धित भारु रहेको अनुमान छ ।
प्रकाशित मिति: शुक्रबार, चैत १८, २०७३
