काठमाडौं : मुलुकभर सञ्चालनमा रहेका २३ भन्सार कार्यालयमध्ये ११ वटा भन्सार कार्यालयबाट कुनै पनि माल निर्यात नभएको पाइएको छ । भन्सार विभागले हालै सार्वजनिक गरेको नौ महिनाको विवरणमा ती भन्सार कार्यालयबाट कुनै पनि प्रकारको निर्यात नभई शून्य अवस्थामा रहेको पाइएको हो ।
विभागका अनुसार जलेश्वर, सुथौली, सुनसरी, जनकपुर, सर्लाही, भद्रपुर, महेशपुर, सिरहा, राजविराज, टाँडी र सेती भन्सार कार्यालयबाट चालू आर्थिक वर्षको नौ महिनाको अवधिमा कुनै पनि सरसामग्री निर्यात नभएको पाइएको छ । राजश्व सङ्कलनका लागि भन्दै सरकारले जनशक्ति एवं साधन र स्रोत उपलब्ध गराएको भए पनि निर्यात हुन नसकेको पाइएको हो ।
ती भन्सार कार्यालयमध्ये टाँडी र सेती भन्सार कार्यालयबाट आयातसमेत नभएको पाइएको छ । यस्तै, गौर भन्सार कार्यालयबाट पनि ०.१६ प्रतिशत मात्रै निर्यात भएको पाइएको छ । विभागका अनुसार वीरगञ्ज भन्सार कार्यालयबाट आयात र निर्यातको मात्रा बढी छ । वीरगञ्ज भन्सार कार्यालयबाट तीन खर्ब ६७ अर्ब रुपैयाँ बराबरको आयात भएको छ । प्रतिशतका आधारमा सो भन्सार कार्यालयबाट ३४.५६ प्रतिशत सामान आयात भएको छ । उक्त भन्सार कार्यालयबाट १४ अर्ब ४९ करोड रुपैयाँ बराबरको निर्यात भएको छ ।
दोस्रो स्थानमा भैरहवा भन्सार कार्यालय रहेको छ । सो भन्सार कार्यालयले एक खर्ब ७८ अर्ब ९६ करोड ८३ लाख चार हजार रुपैयाँ बराबरको सरसामान आयात भएको छ । प्रतिशतका आधारमा १६.८६ प्रतिशत सामान सो भन्सार कार्यालयबाट आयात भएको छ । चालू आवको नौ महिनाको अवधिमा भैरहवा भन्सारबाट दुई अर्ब ७३ करोड ४१ लाख २२ हजार रुपैयाँ बराबरको सामान निर्यात भएको छ ।
विराटनगर भन्सार कार्यालय हुँदै एक खर्ब ३१ अर्ब रुपैयाँ बराबरको आयात हुँदा करिव २१ अर्ब रुपैयाँ बराबरको निर्यात भएको विभागले जनाएको छ । त्रिभुवन अन्तर्राष्ट्रिय विमानस्थल भन्सार हुँदै एक खर्ब ३० अर्ब ९५ करोड पाँच लाख २८ हजार रुपैयाँ बराबरको सामान आयात हुँदा १७ अर्ब ७५ करोड बराबरको निर्यात भएको छ । निर्यातका आधारमा हेर्दा त्रिभुवन अन्तर्राष्ट्रिय विमानस्थलबाट निर्यात बढी भएको पाइएको छ ।
यस्तै, वीरगञ्ज सुक्खा बन्दरगाहबाट एक खर्ब नौ अर्ब चार करोड ४१ लाख ३९ हजार रुपैयाँ बराबरको आयात हुँदा तीन अर्ब २२ करोड तीन लाख ४१ हजार रुपैयाँ बराबरको निर्यात भएको छ । नेपालगञ्ज भन्सारबाट चालू आवको नौ महिनामा ४० अर्ब ९१ करोड आठ लाख ५२ हजार रुपैयाँ बराबरको आयात हुँदा एक अर्ब ८० करोड ९७ लाख ८१ हजार रुपैयाँ बराबरको निर्यात भएको छ ।
यस्तै, उत्तरी छिमेकी चीनसँगको कारोबार हुने एक मात्र स्थल नाका रसुवागढी भन्सार कार्यालय हुँदै ३१ अर्ब ५८ करोड २४ लाख ७४ हजार रुपैयाँ बराबरको आयात भएको छ । सो भन्सार हुँदै ८४ करोड ९२ लाख ४९ हजार रुपैयाँ बराबरको मात्रै निर्यात भएको छ ।
मेची भन्सार कार्यालयबाट ३० अर्ब ४७ करोड ७१ लाख ७२ हजार रुपैयाँ बराबरको आयात हुँदा छ अर्ब ८७ करोड ४७ लाख ५७ हजार रुपैयाँ बराबरको निर्यात भएको छ । कृष्णनगर भन्सार कार्यालयले सो अवधिमा १८ अर्ब २० करोड ९१ लाख ९० हजार रुपैयाँ बराबरको आयात हुँदा ३२ करोड १५ लाख २७ हजार रुपैयाँ बराबरको निर्यात हुन सकेको छ ।
कैलाली भन्सार कार्यालयबाट चालू आवको नौ महिनामा १५ अर्ब ३३ करोड ४० लाख ४३ हजार रुपैयाँ बराबरको आयात गर्दा ५९ करोड ३७ लाख ७६ हजार रुपैयाँ बराबर मात्रै निर्यात भएको छ । चालू आवको नौ महिनाको अवधिमा १० खर्ब ६१ अर्ब ६१ करोड १२ लाख चार हजार रुपैयाँ बराबरको माल वस्तु आयात हुँदा ६९ अर्ब ८२ करोड २३ लाख ४८ हजार रुपैयाँ बराबरको मात्रै निर्यात भएको छ ।
-1732776560.jpg)
