काठमाडौं : लगातार घट्दै आएको शेयर बजार आज भने करिब २२ अङ्कले वृद्धि भएको छ । नेपाल स्टक एक्सचेञ्जका अनुसार कारोबार मापक नेप्से परिसूचक २१.७३ बिन्दुले वृद्धि भई एक हजार २९९.४१ बिन्दुमा पुगेको छ ।
प्रतिशत आधारमा हेर्दा आज बजार १.७० प्रतिशतले वृद्धि भएको हो । यस्तै, ठूला कम्पनीको शेयर कारोबार मापन गर्ने सेन्सेटिभ परिसूचक ५.०१ अङ्कले बढेको छ । सेन्सेटिभ परिसूचक भने १.८३ प्रतिशतले वृद्धि भएको छ ।
उच्च अङ्कले नेप्से परिसूचक वृद्धि भए पनि कारोबार रकम भने सोहीअनुसार वृद्धि हुन सकेन । कूल १७२ कम्पनीको २० लाख ७५ हजार ४० कित्ता शेयर ६३ करोड ३६ लाख ५३ हजार ५२९ रुपैयाँमा कारोबार भयो । स्टकका अनुसार कारोबार भएका कूल ११ उपसमूहमध्ये आज अन्य उपसमूहबाहेक अरू सबै उपसमूहको शेयर वृद्धि भएको छ । अन्य उपसमूह ०.८५ बिन्दुले घटेको छ । बैंकिङ २९.६१, व्यापार १०.३५, होटल १९.८४, विकास बैंक १५.८६, जलविद्युत् ३.३६, वित्त १.७६, निर्जीवन बीमा ४.६६, उत्पादन ७३.३६, लघुवित्त १०.१७ र जीवन बीमा ७५.६९ बिन्दुले बढेका छन् ।
स्टकका अनुसार कारोबारका आधारमा शिवम् सिमेन्ट शीर्ष स्थानमा रहेको छ । प्रति कित्ता ३८८ रुपैयाँमा चार करोड ९४ लाख १५ हजार १५२ रुपैयाँमा शिवम्को कारोबार भयो । यस्तै, जनता बैंकको तीन करोड ८६ लाख ५४ हजार ६७८, नेपाल बैंक लिमिटेड तीन करोड ८५ लाख ५२ हजार ३५९, एनएमबी बैंक तीन करोड १० लाख १४ हजार ३७७, प्रभु बैंक दुई करोड ४० लाख ९४ हजार नौ, नेको इन्स्योरेन्स दुई करोड दुई लाख एक हजार ८५८ रुपैयाँमा कारोबार भई शीर्ष स्थानमा रहे ।
स्टकका अनुसार आज साल्ट ट्रेडिङ लिमिटेडका शेयरधनीले ९.७८ प्रतिशतले कमाए । मल्टिपर्पोज फाइनान्स कम्पनी ९.७०, शिवम् सिमेन्ट ८.३८, मेगा बैंक ६.०४, बैंक अफ कमाठमाडौं ५.४५, एसियन लाइफ इन्स्योरेन्स ४.६०, जनता बैंकका शेयरधनीले ४.५२ प्रतिशतले कमाएका छन् ।
त्यस्तै, पाँचथर पावर कम्पनीका शेयरधनीले ६.२७ प्रतिशतले गुमाए । मिर्मिरे लघुवित्त वित्तीय संस्था ५.५९, युनिभर्सल पावर कम्पनी ३.१२, सिद्धार्थ इक्विटी फण्ड २.८३, आरम्भ माइक्रोफाइनान्स वित्तीय संस्थाका शेयरधनीले २.३९ प्रतिशतले गुमाए ।
-1732776560.jpg)
