काठमाडौं : नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले कार्ल मार्क्सले सर्वहारा र श्रमजीवीका निम्ति त्याग, तपस्या र बलिदान गरेका बताउँदै आफूहरू भने कार्ल मार्क्सभन्दा सम्पन्न भएको बताएका छन् ।
आइतबार कार्ल मार्क्सको २०१औँ जन्मजयन्तीको अवसरमा कार्ल मार्क्स, द्विशतवार्षिकी समारोह समितिले आयोजना गरेको कार्यक्रममा बोल्दै प्रचण्डले यस्तो बताएका हुन् ।
हाम्रा आफ्ना घर, गाडी सबै सुविधा छन् , प्रचण्डले भने, ‘त्यस कारण अहिले कहीँ न कहीँ केही ‘मिस’ भएको छ । अब त्यसलाई खोज्नुपर्ने, अनुसन्धान गर्नुपर्ने जिम्मेवारी हाम्रो काँधमा छ ।
हिजो जनयुद्धका समयमा आफूहरू कहिले जंगलमा सुतेको, कहिले कहाँ भन्दै त्यतिबेला जंगल जस्तो नलाग्ने गरेको र जनताका बीचमा, कार्यकर्ता सबैको विश्वास, प्रेम, भरोसाको बीचमा भएजस्तो लागेको उनले स्मरण पनि गरे ।
हिजो सानो जनआधार हुँदा पनि संसारै जितिन्छ भन्ने आत्मविश्वास र मनोबल रहेको तर अहिले सबै हुँदा केही पनि सकिँदैन भनेजस्तो भएको बताउँदै प्रचण्डले भने, हामी थोरै हुँदा लाखौँ करोडौँ जनताका नेता हौँ भनेजस्तो गर्वका साथ हिँडिन्थ्यो । अहिले एक्लै एक्लै भएजस्तो भएको छ ।
अहिले पार्टीमा आत्मीयता, हार्दिकता हराउँदै गएको भन्दै प्रचण्डले अहिले साथीहरू देख्दा एकअर्कामा रिस उठेजस्तो, देख्न नपरे पनि हुन्थ्यो जस्तो, बोल्न नपरे पनि हुन्थ्यो जस्तो किन भएको छ ? भन्दै प्रश्न गरे ।
अध्यक्ष प्रचण्डले दुई दिनभित्र पार्टी एकीकरणका बाँकी कामलाई पनि पूर्णता दिने पनि बताए । उनले जिल्ला कमिटीहरूको एकीकरणको काम सकिएको भन्दै जनसंगठनहरूको एकीकरण र नेताहरूको जिम्मेवारी बाँडफाँडको काम पनि दुई दिनभित्र सम्पन्न गर्ने दाबी गरे ।
भोलि सोमबार पार्टीको सचिवालय बैठक बोलाइएको र पार्टी एकीकरणको बाँकी काम पूरा हुनेवित्तिकै आठ महिनामा पार्टीका जिल्ला अधिवेशनहरू सम्पन्न गर्ने योजना रहेको पनि उनले बताए ।
प्रकाशित मिति: आइतबार, वैशाख २२, २०७६
-1732776560.jpg)
