पाँचथर : पूर्वी पहाडमा निर्माणाधीन काबेली करिडोर १३२ केभी प्रसारण लाइन आयोजना निर्माणको कार्य अन्तिम चरणमा पुगेको छ । ९०.०२१ किलोमिटर लामो करिडोरको दोस्रो खण्डमा शनिबारबाट परीक्षण प्रसारण सुरु गरिएको छ ।
मुआब्जा वितरण, रुख कटान लगायतका समस्याका कारण लामो समय अवरोध भएको करिडोरको इलाम–फिदिम खण्ड निर्माण पूरा भई शनिबारबाट परीक्षण प्रसारण सुरु गरिएको हो । ४२.८८ किलोमिटर लामो यस खण्डमा सोमबारबाट लाइन चार्ज गरिने आयोजना प्रमुख दीपेन्द्रराज द्विवेदीले जानकारी दिए । इलामको गोदकदेखि फिदिमको थापाटारसम्मको यस खण्डमा १२६ टावर छन् ।
करिडोरको तेस्रो खण्ड फिदिम–अमरपुरमा भने टावर गाढ्ने काम पूरा हुन लागेको छ । ‘एउटा टावर गाड्न बाँकी छ’, आयोजना प्रमुख द्विवेदीले भने ।
आर्थिक वर्ष २०६२/६३ मा सुरु भएको आयोजनाको निर्माण कार्य भने २०६६/६७ मा सुरु भएको थियो । पाँचथरको फिदिम र इलामको सिद्धिथुम्का क्षेत्रमा मुआब्जा वितरणमा विवाद हुँदा वर्षौँसम्म आयोजनाको निर्माणकार्य अवरुद्ध भएको आयोजना प्रमुख द्विवेदीको भनाइ छ । यस्तै टावरका लागि आवश्यक पर्ने १.५३ हेक्टर वन क्षेत्रका रुख कटानीका गर्न समयमै माथिल्ला निकायबाट आदेश नआउँदा आयोजनाको निर्माण कार्य एक दशकसम्म पुगेको हो ।
सो करिडोरअन्तर्गत झापाको दमक, इलामको गोदक, पाँचथरको फिदिम र पाँचथरकै अमरपुरमा गरी चार सबस्टेसन निर्माण गरिएको छ । २५ करोड लागतले दमक सबस्टेसन सुरुमै निर्माण सम्पन्न भएको थियो । बाँकी तीन सबस्टेसन निर्माणको लागत ५५ करोड थियो । तीन वटै सबस्टेसन दुई वर्षअघि निर्माण सम्पन्न भइसकेका छन् ।
प्रकाशित मिति: आइतबार, वैशाख २२, २०७६
-1732776560.jpg)
