जनकपुर : प्रदेश २ को नाम, राजधानी र भाषाका विषयमा टुङ्गो लगाउन गठित संवाद तथा सुझाव आयोगले प्रदेश सरकारलाई आफ्नो प्रतिवेदन बुझाएको छ ।
बिहीबार मुख्यमन्त्री तथा मन्त्रिपरिषद्को कार्यालयमा आयोगका संयोजक हरिवंश झाले मुख्यमन्त्री लालबाबु राउतलाई प्रतिवेदन बुझाएका हुन् ।
आयोगले आठवटै जिल्लामा पुगेर राजनीतिक दल, नागरिक समाज, संघसंस्था प्रतिनिधिसँग छलफल तथा संवाद गरी प्रतिवेदन तयार गरेको हो । प्रतिवेदन तयार पार्न आयोगले ८०० बढी प्रतिनिधिसँग छलफल गरेको बताएको छ ।
आयोग गठन भएको ४५ दिन भित्र प्रतिवेदन प्रदेश सरकारलाई बुझाउन समय सीमा दिइएको भए पनि ४५ दिनमा काम नसकिएपछि आयोगले छ महिनाको समयमा प्रतिवेदन तयार पारेको थियो ।
हस्तान्तरण गरिएको प्रतिवेदन सार्वजनिक गरिएको छैन । प्रतिवेदनमा प्रदेशको नामाकरणबारे मधेस, मिथिला, मिथिला–भोजपुरा, मध्यमधेस, जानकी प्रदेशमध्येबाट एउटा राख्न सुझाव आएको बताइएको छ ।
राजधानीका विषयमा जनकपुर, वीरगन्ज, बर्दिबास, लहान, राजविराज, गौर, लालबन्दीलागयतका ठाउँहरू सुझावको रूपमा आएका स्रोतले जानकारी दिएको छ ।
प्रतिवेदन तयार गर्न ३० लाख रुपैयाँ प्रदेश सरकारले छुट्याएको थियो । त्यसमध्ये १७ लाख रुपैयाँ खर्च गरेर ६२ पृष्ठको प्रतिवेदन तयार पारिएको हो ।
प्रदेशको नाम, राजधानी र भाषा टुङ्गो लगाउन २०७५ कार्तिक ११ गते प्रदेश २ को मन्त्रिपरिषद् बैठकले डा. हरिवंश झाको संयोजकत्वमा तीन सदस्यीय संवाद तथा सुझाव आयोग गठन गरेको थियो ।
संवाद तथा सुझाव आयोगको प्रतिवेदन बुझ्दै मुख्यमन्त्री राउतले आयोगले बुझाएको प्रतिवेदनको अध्ययन गरेर मन्त्रिपरिषद् बैठकबाट प्रदेशसभाको समितिमा पठाइने बताए ।
प्रकाशित मिति: बिहीबार, वैशाख १९, २०७६
-1732776560.jpg)
