काठमाडौं : साझा विवेकशील पार्टीले सात वर्ष स्थायी बसोबास गरेको अवस्थामा नेपाली नागरिकसँग विवाह गर्ने विदेशीले नेपाली नागरिकता लिन पाउने धारणा राखेको छ ।
नागरिकता विधेयकमाथि आफ्नो धारणा राख्दै साझा विवेकशील पार्टीले महिला या पुरुष जो भए पनि नेपालीसँग विहे गरी आउने विदेशी नागरिक सात वर्ष नेपालमै स्थायी बसोबास गरेपछि मात्र नागरिकता पाउने व्यवस्था गर्नुपर्ने बताएको हो ।
‘नागरिकता नपाउँदासम्म पारिवारिक सम्बन्ध व्यवस्थापन गर्न, कानुनी रूपमा निर्वाह गर्नुपर्ने भूमिका निर्वाह गर्न र अन्य अत्यावश्यक कार्यहरू गर्नका लागि विशेष परिचय पत्र प्रदान गर्न सकिन्छ’, पार्टी प्रवक्ता सूर्यराज आचार्यद्वारा जारी वक्तव्यमा भनिएको छ ।
अहिले नेपाली पुरुषसँग विवाह गर्ने विदेशी महिलाले विदेशी नागरिकता त्याग गरेको प्रमाण पेस गर्नेवित्तिकै नागरिकता पाउने व्यवस्था छ तर नेपाली महिलासँग विवाह गरेका विदेशी पुरुषले नागरिकता पाउने व्यवस्था भने छैन ।
साझा विवेकशीलले आमाको नागरिकता लिँदा बुबाको पहिचान खुलाउनुपर्ने व्यवस्था विभेदकारी रहेको भन्दै संभव भए बुबाआमा दुवैको परिचय खुलाउनु उपयुक्त हुने पनि उल्लेख गरेको छ ।
साझा विवेकशीलले २०५४ सालमा जितेन्द्रनारायण देवको समितिले ३४ हजार व्यक्तिलाई जन्मको आधारमा दिएको नागरिकता खारेज गर्न पनि माग गरेको छ ।
प्रकाशित मिति: मंगलबार, वैशाख १७, २०७६
-1732776560.jpg)
