विराटनगर : गत शनिबार बिहान मृत भेटिएकी रिना बस्नेतको स्थानीयबासीको विरोधका बाबजुद आइतबार अन्तिम संस्कार गरिएको छ ।
मृतक रिनाको परिवारले धरानस्थित वीपी कोइराला स्वास्थ्य विज्ञान प्रतिष्ठानमा राखिएको शब बुझेर चतारास्थित सप्तकोशीको घाटमा रिनाको अन्तिम संस्कार गरेको हो । यसअघि परिवारले उनको हत्या भएको भन्दै शब बुझ्न अस्वीकार गर्दै आएको थियो ।
रिनाको शबमा उनका १३ वर्षीय छोरा साइमन बस्नेतले दागबत्ती दिएका थिए । अन्तिम संस्कारमा रिनाको परिवार र माइतीपक्षका आफन्तहरु सहभागी भएका थिए ।
स्थानीयबासीले रिनाको हत्या भएको भन्दै दोषीमाथि कारबाहीको माग गर्दै आन्दोलन गरेका थिए । उनको शबयात्रा र अन्तिम संस्कारका लागि पथरी नल्याइकन धरानबाट सिधै चतारा लगेर अन्त्यष्टि गरिएको हो ।
उनको हत्या भनिएपनि खसेर नै मृत्यु भएकोतर्फ बल पुग्ने गरी पोस्टमार्टम रिपोर्ट आएको छ भने प्रहरीले पनि घरबाट खसेर मृत्यु भएको बताएको छ ।
उनको अन्त्यष्टिमा जानका लागि उद्योग वाणिज्य संघले दुई वटा गाडीको व्यवस्था गरेको भएपनि कोही पनि सहभागी भएनन् । संघका अध्यक्ष दिपक बस्नेत भने अन्त्यष्टिमा सहभागी भएका थिए ।
प्रकाशित मिति: आइतबार, वैशाख १५, २०७६
-1732776560.jpg)
