काठमाडौं : सरकारले आयोजना गरेको लगानी सम्मेलनको प्रतिफल देखिन थालेको छ । ठूलो मात्रामा लगानी भित्र्याएर आर्थिक समृद्धिको लक्ष्य पहिल्याउने उद्देश्यका साथ गत चैत १५ र १६ गते आयोजना गरेको सम्मेलनमा क्रममा प्रस्तुत भएका कूल ७७ परियोजनामध्ये ३१ परियोजनामा कूल २५ खर्ब रुपैयाँ बराबरको लगानी प्रस्ताव आएको छ । त्यसमा २६ वटा सम्मेलनमा क्रममा ‘शोकेस’मा राखिएका र आह्वान नभएका थप पाँच गरी कूल ३१ परियोजनामा आवेदन परेको हो ।
लगानी बोर्डले आज आयोजना गरेको पत्रकार सम्मेलनमा बोर्डका प्रमुख कार्यकारी अधिकृत महाप्रसाद अधिकारीले भने, उत्साहजनक रूपमा प्रस्ताव आएका छन् । प्राप्त भएका प्रस्तावलाई मसिनोसँग अध्ययन गरेर आवश्यक निर्णय लिइन्छ ।
सम्मेलनका क्रममा सरकारीस्तरबाट ५० र निजी क्षेत्रले २५ आयोजनालाई ‘शोकेस’मा राखेका थिए । शोकेसमा राखिएका आयोजनामध्ये धेरैले भौतिक पूर्वाधार, ऊर्जा, शहरी पूर्वाधारमा चासो व्यक्त गरेका छन् ।
बोर्डका अनुसार कृषि पूर्वाधारतर्फ सातवटा परियोजनाका लागि प्रस्ताव आएको छ । त्यसमा उर्लाबारी, हेम्जा, बनेपा र चितवन, वीरेन्द्रनगर र तिलोत्तमामा एकीकृत कृषि पूर्वाधारका लागि प्रस्ताव परेका हुन् ।
यस्तै, स्वास्थ्य तथा शिक्षामा धुलिखेल मेडिसिटी र गण्डकी टेक्निकल विश्वविद्यालयका लागि समान एक/एक प्रस्ताव परेका छन् ।
यस्तै, ऊर्जातर्फ ७६२ मेगावाट क्षमताको तमोर जलाशययुक्त आयोजनाका लागि दुईवटा प्रस्ताव आएको प्रमुख कार्यकारी अधिकृत अधिकारीले जानकारी दिए । पश्चिम सेती ७५०, एसआर ६ ९२७, सुनकोसी दोस्रो एक हजार ११०, सुनकोसी तेस्रो ५३६, तल्लो अरुण एक हजार ३०० र ५५० मेगावाट क्षमताको सौर्य परियोजनाका लागि समान एक/एकवटा प्रस्ताव आएका छन् ।
औद्योगिक पूर्वाधारतर्फ एक आवेदन परेको छ । पर्यटनतर्फ तीनवटा परियोजनाका लागि प्रस्ताव आएका छन् । त्यसमा जानकी हेरिटेज होटल, तालतलैया थेमे पार्क र ड्रिमल्याण्ड धुलिखेलका लागि पनि एक/एकवटा प्रस्ताव परेका छन् ।
यातायात पूर्वाधारका लागि नौवटा परियोजनाका लागि प्रस्ताव आएका छन् । काठमाडौं चक्रपथ, बाहिरी चक्रपथका लागि समान चार/चारवटा प्रस्ताव आएका छन् । निजगढ अन्तर्राष्ट्रिय विमानस्थलका लागि छवटा प्रस्ताव आएको प्रमुख कार्यकारी अधिकृत अधिकारीले जानकारी दिए ।
काठमाडौं उपत्यका मेट्रो रेल, पूर्व–पश्चिम विद्युतीय रेलमार्ग, काठमाडौँ-पोखरा-लुम्बिनी रेलमार्ग, काठमाडौंको स्कार्य रेलका लागि समान एक/एक प्रस्ताव परेका छन् । सामाखुसी–टोखा–छहरे सुरुङमार्ग र धनगढी क्षेत्रीय अन्तर्राष्ट्रिय विमानस्थलका लागि समान दुई/दुईवटा प्रस्ताव आएका छन् ।
शहरी पूर्वाधारतर्फ अन्तर्राष्ट्रिय सम्मेलन केन्द्र निर्माणका लागि दुई, जनकपुरको फोहोर व्यवस्थापन, विराटनगरको फोहोर व्यवस्थापन र मेलम्ची, खोकनालगायतका क्षेत्रमा फोहोर पानी व्यवस्थापनका लागि एक/एक प्रस्ताव परेका छन् ।
सम्मेलनमा भएको सहभागिताका बारेमा पहिलो पटक आधिकारिक जानकारी दिँदै बोर्डले ४० देशका ८०९ प्रतिनिधि सहभागी भएका र त्यसमा ३०० कम्पनी सहभागी रहेको बताएको छ । यस्तै, नेपालका १०० कम्पनीका ७०० प्रतिनिधि सहभागी भएका थिए । चारवटा छलफल सत्रमा विभिन्न छ विषय समावेश भएका थिए ।
त्यस्तै, छुट्टै चार विषयगत छलफल सत्र, ३६ द्विपक्षीय बैठक, ३९ सरकारी र निजी क्षेत्रबीचको बैठक, ३० वटा व्यवसायी–व्यवसायीबीचको बैठक भएका थिए ।
बोर्डका प्रमुख कार्यकारी अधिकृत अधिकारीले बताएअनुसार शनिबारसम्म २६ परियोजनामा ४३ आवेदन आएका छन् । पहिलो चरणमा २७ परियोजनाका लागि तीन महिनाभित्र विकासकर्ता छनोट गरिसक्ने तयारी गरिएको छ ।
दोस्रो चरणमा १७ परियोजनाका लागि नौ महिनाभित्र र तेस्रो चरणका छ परियोजनाका लागि १४ महिनाभित्र विकासकर्ता छनोट गर्ने गरी कार्ययोजना तयार भएको छ । प्राप्त आवेदनको मूल्याङ्कन तथा सम्मेलनमा भएका समझदारी तथा सम्झौताको कार्यान्वयनको अनुगमन गर्न प्रधानमन्त्री तथा मन्त्रिपरिषद् कार्यालयका आर्थिक तथा भौतिक पूर्वाधार हेर्ने सचिवको नेतृत्वमा छ सदस्यीय समिति गठन गरिएको छ ।
यही वैशाख ५ गते बसेको बोर्ड बैठकले भौतिक पूर्वाधार तथा यातायात, ऊर्जा, जलस्रोत तथा सिँचाइ, उद्योग वाणिज्य तथा आपूर्ति, संस्कृति, पर्यटन तथा नागरिक उड्डयन मन्त्रालय, बोर्डका कार्यालयका एक/एक जना सहसचिव रहने गरी समिति गठन गरिएको छ ।
- रासस
प्रकाशित मिति: आइतबार, वैशाख ८, २०७६
-1732776560.jpg)
