भक्तपुर : भूमि व्यवस्था, सहकारी तथा गरिबी निवारणमन्त्री पद्माकुमारी अर्यालले मन्त्रालय मातहतका कार्यालयलाई डिजिटल बनाएर सुशासन कायम गरिने बताएकी छन् । नापी कार्यालय भक्तपुरमा जेष्ठ नागरिक एवं शारीरिक रूपले अशक्त सेवाग्राहीका लागि निर्मित विश्राम कक्ष तथा बालबालिका स्तनपान कक्षको शुभारम्भ गर्दै मन्त्री अर्यालले त्यस्तो बताएकी हुन् ।
नापी कार्यालय भक्तपुर र भूमिसुधार तथा मालपोत कार्यालय भक्तपुरको अनुगमन गर्दै मन्त्री अर्यालले पहिलो नम्बरमा सुशासन कायम गर्ने उद्देश्य लिएर मन्त्रालय अगाडि बढेको बताइन् । मन्त्रालय मातहतका नापी तथा मालपोत कार्यालयमाथि सुशासनको विषयलाई लिएर प्रश्न उठेको भन्दै मन्त्री अर्यालले तर केही रूपमा भएका कमजोरीका कारण माथि क्लिन भए पनि तलबाट गिज्याउने काम भइरहेको धारणा राखिन् ।
हामी पहिलो नम्बरमा सुशासन कायम गर्न लागिपरेका छौँ । हामी मातहतका कार्यालयमाथि प्रश्न उठेका छन् , मन्त्री अर्यालले भनिन्, हामी क्लिन छौँ, भ्रष्टाचारको विषयमा हामीमाथि कुनै प्रश्न उठाउने ठाउँ छैन तर तलबाट केही बदमासी भएका कारण हामीलाई गिज्याउने काम भइरहेको छ।
मन्त्रालय मालपोत/नापीमा भइरहेका बदमासी सिस्टमबाटै अन्त्य गर्न लागिपरेको मन्त्री अर्यालले बताइन् । अब कर्मचारीलाई गाली गरेर मात्र होइन, सिस्टमबाट नै यो कुरालाई च्यालेञ्ज गर्नुपर्छ भनेर हामी डिजिटल प्रविधिमा हाम्रा सेवालाई ढाल्न लागिपरेका छौँ , उनले भनिन् । डिजिटल सेवाको सुरुवात स्वरूप कलंकीबाट नमुना कार्यालय बनाउन सुरु गरिएको भन्दै मन्त्री अर्यालले यसले राजस्वमा हुने चुहावट बन्द गर्ने, सुशासन कायम हुने र जनताले सहज रूपमा सेवा प्राप्त गर्ने बताइन् ।
अबको एक वर्षमा देशैभरका मालपोत र नापी कार्यालयमा त्यो सिस्टम लागू गर्ने योजनाअन्तर्गत मन्त्रालय अगाडि बढेको भन्दै उनले डेढ वर्षमा स्थानीय तहलाई हस्तान्तरण गर्दा प्रविधिसहितको सेवा हस्तान्तरण गरिने दाबी गरिन् । यसको सुरुवात कलंकी मालपोत कार्यालयबाट गरेका छौँ । एक वर्षभित्र देशैभरका सबै मालपोत र नापी कार्यालयमा डिजिटल सेवा लागू गर्ने योजनामा हामी लागेका छौँ , उनको भनाइ थियो ।
डेढ वर्षमा स्थानीय तहलाई हस्तान्तरण गर्दा प्रविधि हस्तान्तरण गर्ने मन्त्री अर्यालले बताइन् । मन्त्री अर्यालले नमुना कार्यालय बनाउने मन्त्रालयको अभियान भएकाले नमुना कार्यालय बनाउँदा पैसाको कारणले काम नरोकिने पनि बताइन् । बिचौलियामुक्त कार्यालय बनाउन लागेको भन्दै उनले सेवाग्राहीबाहेक अन्य व्यक्तिलाई कार्यालय हाताभित्र प्रवेश निषेध गरेर सेवाग्राहीमुखी सेवा दिनुपर्ने धारणा राखिन् ।
कर्मचारीतिर लक्षित गर्दै मन्त्री अर्यालले मान्छे मरेर जाँदा शरीर मात्रै लिएर जाने भएको हुनाले जनतालाई सेवा दिनका निम्ति इमानदारी देखाउन आग्रह पनि गरिन् । उनले राम्रो गर्ने कर्मचारीलाई प्रोत्साहन र गलत गर्ने कर्मचारीलाई दण्डितसमेत गरिने बताइन् । मान्छे मरेर जाँदा कात्रोमा खल्ती हुँदैन । जनताको जीवन जिउन साह्रै निकृष्ट हुनुपर्दैन , उनको भनाइ थिऽयो, राम्रो काम गर्नुहोस् । हामी सबै तपाईंहरूको साथमा छौँ । हामी यहाँ देखिएका भ्रष्टाचार प्रविधिमार्फत् अन्त्य गर्छौ।
कार्यालयको अनुगमनपछि मन्त्री अर्यालले नहुने काम कसैले टेबुल ठोक्दैमा कानुन मिचेर गर्न जरुरी नभएको भन्दै कतिपय काम गर्दा व्यावहारिक कुरामा पनि ध्यान दिनुपर्ने बताइन् । त्यस अवसरमा नापी कार्यालय भक्तपुरका प्रमुख ज्ञानेन्द्रकुमार विष्टले सात महिनादेखि कार्यालयले आफ्नै भवनबाट सेवा दिइरहेको, अनधिकृत व्यक्तिको प्रवेश रोक्न डोरलक सिस्टम अपनाइएको, डिजिटल रूपमा सेवा दिइएको, दोहोरो स्क्रिन डिस्प्लेमार्फत् कम्प्युटर सेवा दिइएको, टोकन प्रणालीमार्फत् सेवा दिइएको जानकारी दिए ।
यसैगरी मालपोत कार्यालय भक्तपुरका प्रमुख ध्रुवप्रसाद कोइरालाले कार्यालयमा भइरहेको सेवा तथा समस्याका बारेमा मन्त्री अर्याललाई जानकारी गराएका थिए । कार्यक्रममा भक्तपुरका प्रमुख जिल्ला अधिकारी, जिल्ला समन्वय समिति भक्तपुरका संयोजक नवराज गेलालले सेवाग्राहीमैत्री भएर सेवा प्रवाह गर्न आग्रह गरेका थिए ।
प्रकाशित मिति: शुक्रबार, चैत २९, २०७५
-1732776560.jpg)
