काठमाडाैं :सरकारले दैलेखमा रहेको पेट्रोलियम पदार्थ मिथेन ग्यासको आगामी वैशाख तेस्रो हप्तादेखि उत्खनन गर्ने भएको छ ।
चीनका तर्फबाट चाइना जिओलोजिकल सर्वेका भाइस प्रेसिडेन्ट वाङकुल र नेपालका तर्फबाट खानी तथा भू–गर्व विभागका महानिर्देशक सोमनाथ सापकोटाबीच बेइजिङमा सम्झौता भएपछि उक्त पेट्रोलियम मिथेन ग्यासको उत्खननका लागि सरकार तयार भएको हो ।
तत्कालीन प्रधानमन्त्री केपी शर्मा ओलीको नेतृत्वमा सरकार हुँदा नाकाबन्दीसँगै मुलुकभर पेट्रोलियम पदार्थको चरम संकट परेपछि विसं २०७२ मंसिर २१ गते तत्कालीन सरकारका उद्योगमन्त्री सोमप्रसाद पाण्डेसहितको टोलीले दैलेखको शिरिस्थानमै गएर पेट्रोलियम पदार्थको अनुसन्धान गरी उत्खननको घोषणा गरेको थियो ।
त्यसबखत अनुसन्धान गरी चाइना फर्केको टोलीले पेट्रोलियम पदार्थ मिथेन ग्यास भएको पुष्टि गरेपछि दोस्रोपटक प्रधानमन्त्री केपी शर्मा ओलीले दैलेखको ग्यास उत्खनन गर्न चाइनाको कम्पनीसँग सम्झौता गरेलगत्तै उत्खनन हुने भएको हो ।
खानी तथा भू–गर्व विभागका परियोजना प्रमुख सुदीप रजौरेका अनुसार वैशाख १८ देखि औपचारिक रूपमा उक्त कार्यको थालनी हुने छ । उनले चाइनाको कम्पनीसँग दुई अर्ब २० करोड रुपैयाँको सम्झौता भएको बताए । उनले भने, ‘देखिएको ग्यास मिथेन हो भनेर प्रमाणित भइसक्यो ।’ अब कति परिमाणमा छ, कहाँ छ, उत्खनन गर्दा हुने परिमाण र लागतको मेल खान्छ कि खाँदैन जस्ता विषयको ठोस अनुसन्धान गर्न पनि उत्खननको काम थालनीे हुने बताए ।
स्थानीयले यसलाई दैवीशक्ति भन्दै नियमित पूजा गर्दै आएका थिए । खानी तथा भू–गर्व विभागले पहिला नै दैलेखको खोलामा बगेको पेट्रोलियम पदार्थको नमूना संकलन गरेर काठमाडौँ पु¥याएको १५ वर्षपछि ग्यास उत्खनन हुने भएपछि दैलेखका उद्योगी व्यापारी खुसी भएका छन् । विगतका १० वटा स्थानमा पेट्रोलियम पदार्थ अन्वेषणका लागि लाखौँ रकम खर्च गरे पनि त्यसको पुष्टि भएर वास्तविक कुरा बाहिर आउन नसकेका बेला सरकारले पुनःदैलेखको पेट्रोलियम पदार्थ अन्वेषण गरी उत्खननका लागि काम थाल्ने भएपछि केही आशा पलाएको छ ।
यसको उत्खननको सुरुआत गर्न पुनः दैलेखबाटै कामको थालनी गर्ने सरकारले निर्णय गरेको प्रतिनिधिसभा सदस्य रवीन्द्र शर्माले बताए । सयौँ वर्षदेखि जमिनमुनिबाट पेट्रोलियम पदार्थका रूपमा ग्यास निस्किरहेको दैलेखको पञ्चकोसी क्षेत्रमा पेट्रोलियम उत्खनन सुरु हुने भएपछि दैलेखका जनता सम्पन्न हुने उद्योग वाणिज्य संघ कर्णाली प्रदेश कमिटी सदस्य शान्तिप्रसाद शर्माले बताए ।
तत्कालीन द्वन्द्वकै बेला विसं २०६० देखि नै नेपालका विभिन्न स्थानमा पेट्रोलियम पदार्थ हुनसक्छ भन्दै खोजबिन थालिएको थियो । अमेरिकाको टेक्सास कम्पनी र युकेको केएन इनर्जीले समेत लाखौँ डलर अन्वेषणमा खर्च गरिसकेका छन् । सरकारले उपलब्धिमूलक काम नगरेको भन्दै ती कम्पनीसँगको सम्झौता विसं २०७१ मा तोडेको थियो । सरकारको जीटुजी सम्झौताअनुसार अहिले चीनको कम्पनीसँग सम्झौतासँगै काम सुरु गर्ने योजना सरकारको छ । अहिले काममा थप सहजताका लागि पेट्रोलियम नियमावलीको समेत पाँचौँ संशोधन गरिएको छ ।
दैलेखका शिरिस्थान, नाभिस्थान, पादुका, धुलेश्वरलगायत पञ्चकोसी क्षेत्रमा सयौँ वर्षदेखि ज्वालाका रूपमा पेट्रोलियम पदार्थ बलिरहेको छ । धार्मिक दृष्टिकोणले पञ्चकोसी क्षेत्रका रूपमा समेत परिचय बनाउन सफल यो क्षेत्रमा पछिल्ला दिनमा पर्यटकको उलेख्य उपस्थिति हुँदै आएको छ । मुगुको राराताल घुमेर आउने अधिकांश पर्यटक दैलेखको पञ्चकोसी क्षेत्र पुगेर फर्कने गरेका छन् । -रासस
प्रकाशित मिति: बुधबार, चैत १३, २०७५
-1732776560.jpg)
