काठमाडौं । विश्वकप छनोटअन्तर्गत भएकाे खेलमा नेपाल कुवेतसँग ७ गाेलले हारेकाे छ । कुवेत स्पोर्टस क्लबमा भएको खेलकाे सुरुदेखि नै आक्रामक खेलेको कुवेतले १४ मिनेटभित्रै २ गोल गरिसकेको थियो ।
खेलेको छैटौं मिनेटमा युसुफ नासेरले र १४ औं मिनेटमा फेद अल हाजेरीले गोल गरेका थिए । नेपालका लागि दोस्रो हाफ पनि सुखद हुन सकेन । ५१औं मिनेटमा युसुफ नासेरले हेडरमार्फत गोल गरे भने त्यसको ८ मिनेटपछि नै माविले १ गोल थपे ।
६८ औं मिनेटमा कप्तान बादर अल मुत्वाले गोल गरेपछि कुवेतले ५–० को अग्रता लियो । इन्जुरी समयमा थप दुई गोल गर्दै कुवेतले ७–० को जित हात पार्न सफल भयो ।
यस जितसँगै कुवेत समूहको शीर्षस्थानमा उक्लिएको छ । यसअघि समूहको अर्को खेलमा जोर्डनले चाइनिज ताइपेइलाई २–१ ले पराजित गरेको थियो । नेपालले अब अर्को खेलमा मंगलबार चाइनिज ताइपेइसँग खेल्ने छ । अर्को खेलमा सोही दिन कुवेत र अष्ट्रेलिया भिड्ने छन् ।
विश्वकप छनौटतर्फ समूह बी मा परेको नेपाल र कुवेतसँगै अष्ट्रेलिया, जोर्डन र चाइनिज ताइपेई छन् ।
प्रकाशित मिति: शुक्रबार, भदौ २०, २०७६ १५:२१
