काठमाडौँ । नेपाल वायुसेवा निगम (नेपाल एयरलाइन्स)ले अन्तर्राष्ट्रिय उडानमा खतराजन्य पदार्थ ढुवानीको अनुमति पाएको छ ।आज (सोमबार) संस्कृति, पर्यटन तथा नागरिक उड्डयन मन्त्रालयमा एक कार्यक्रमका बिच निगमलाई अन्तर्राष्ट्रिय उडानमा खतराजन्य पदार्थको ढुवानी अनुमति प्रमाणपत्र जारी गरिएको हो ।
कार्यक्रमलाई सम्बोधन गर्दै पर्यटन मन्त्री प्रेम आलेले आफूले मन्त्रालय अनावश्यक खर्च कटौती गर्दै लागको दाबी गरे । नेपाल वायु सेवा निगम घाटामा गएको र ऋणको ब्याजसमेत तिर्न नसकेको भन्दै मन्त्री आलेले नेपाली ध्वजावाहक जहाजलाई नाफामा लैजाने चाहना राखेको बताए ।
‘वायु सेवा निगम नेपाली जनताले तिरेको राजस्वबाट खडा भएको हो, यसलाई कुनै पनि हालतमा माथि उठाउनै पर्छ,’ उनले भने, ‘हामी चाहान्छौं कम भन्दा कम खर्च गरेर नेपाल ध्वजावाहक जहाज नाफामा जाओस् ।’
अहिले पनि ५० अर्ब भन्दा बढी ऋण रहेको भन्दै उनले ९ प्रतिशत हामीले ब्याज तिरिराख्नु पर्ने अवस्था चिन्ताजनक भएको उल्लेख गरे । ‘निगमले किस्ता तिर्न र ब्याज तिर्न सकेका छैन । यस्तै समस्या समाधान गर्नका लागि म यहाँ आएको छु’ उनले भने ।
मन्त्री आलेले खतराजन्य पदार्थ आयात निर्यातको अनुमति पाउनु नेपालको लागि उपलब्धि भएको उल्लेख गरे । खतराजन्य पदार्थ आयात-निर्यातमा अब व्यवसायीहरुलाई झन्झट नहुने र नाफा हुने उनले बताए ।
‘व्यवसायीहरुलाई पनि हरेक ठाउँमा झन्झट हुन्थ्यो । सामान ल्याउँदा कम्तीमा अब सोझै आउन सक्ने भयो । त्यो पनि एउटा उपलब्धि हो’ उनले भने । उनले यात्रु नभएको फ्लाइट पनि यस्ता पदार्थ बोक्दा नाफा हुने बताए ।
आलेले आफू मन्त्रालय मातहतका सबै निकायको कमी, कमजोरी, विकृति र विसङ्गति सुधार्न प्रयासरत रहेको उल्लेख गर्दै सहयोग गर्न सम्बन्धित पक्षलाई आग्रह गरे ।
मन्त्री आलेले संस्कृति, पर्यटन तथा नागरिक उड्डयन मन्त्रालयमा आएदेखि नै विभिन्न सुधारका कामहरु गरिरहेका छन् । अन्य देशसंग हवाई सम्झौतादेखि राष्ट्रिय स्तरमा देखिएका हवाई समस्याका बारेमा पनि उनले चासो देखाउदै आएका छन् । भर्खरै सकिएको नेपालीहरुको महान चाड दशैं तिहार छठ र संगै आएको प्राकृतिक बिपत्तिमा नेपाल बायु सेवा निगमले गर्नुपर्ने कामको बिषयमा उनले सचेत हुन सम्बन्धित निकायलाई चेतावनी दिएका थिए।
प्रकाशित मिति: सोमबार, मंसिर २०, २०७८ १८:३७
