काठमाडौं । नेकपा एमालेका अध्यक्ष केपी शर्मा ओलीले पार्टीभित्र आफूविरुद्ध विरोध गर्नुपर्ने कुनै कारण नरहेको दाबी गरेका छन्। केन्द्रीय समिति बैठकलाई सम्बोधन गर्दै उनले एमालेमा बोल्न नपाइने, अधिनायकवाद र तानाशाही चल्ने भन्ने आरोपहरू निराधार रहेको बताए।
ओलीले आफूविरुद्ध बोल्नै नसकिने भनेर हल्ला फैलाइने गरेको उल्लेख गर्दै भने, “यदि त्यस्तो हुन्थ्यो भने केपी ओलीको विरोधमा आवाज किन उठेन ? विरोध गर्नुपर्ने कामै नगरेपछि केको विरोध ?” उनका अनुसार पार्टीभित्र आलोचनात्मक चेत हराएको भन्ने आरोप वास्तविकतासँग मेल खाँदैन।
उनले पार्टी नेतृत्वप्रति अनास्था सिर्जना गर्ने र एकतामा खलल पुर्याउने उद्देश्यले यस्ता भ्रम फैलाइने गरेको टिप्पणी गरे। “लिडरसिपमाथि अविश्वास जगाउन यस्ता कुरा उचालिन्छन्, तर यस्ता हल्लाबाट हामी प्रभावित हुनु हुँदैन,” ओलीले भने।
महाधिवेशनका क्रममा प्यानल बनाएर वा स्वतन्त्र रूपमा उम्मेदवारी दिएर चुनाव लडिएको स्वीकार गर्दै उनले नतिजा आएसँगै सबै प्यानल र गुट समाप्त भएको स्पष्ट पारे। “अब एमालेको केन्द्रीय कमिटी प्यानलको होइन, देश हाँक्ने एकीकृत कमिटी हो,” उनले जोड दिए।
ओलीका अनुसार अहिलेको केन्द्रीय कमिटी एकढिक्का र एकजुट छ। “यहाँ न पक्ष छ, न विपक्ष, न प्यानल छ, न अप्यानल,” उनले भने।
देश जटिल अवस्थामा रहेको उल्लेख गर्दै अध्यक्ष ओलीले वर्तमान चुनौतीलाई समाधान गर्ने जिम्मेवारी एमालेको काँधमा रहेको बताए। “यही दृढता र एकताको भावनाका साथ हामी अगाडि बढ्छौँ,” उनले निष्कर्ष निकाले।
प्रकाशित मिति: शुक्रबार, पुस ४, २०८२
