काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने रिहा भएलगत्तै पार्टीको मूल जिम्मेवारीमा पुनः फर्किने भएका छन्।
कार्यवाहक सभापति डिपी अर्यालले जारी गरेको विज्ञप्तिमा कानुनी तथा प्रशासनिक प्रक्रिया पूरा भएपछि सभापति लामिछाने तत्काल पार्टी नेतृत्वको जिम्मेवारी सम्हाल्ने जानकारी दिइएको छ।
उच्च अदालत तुलसीपुरको बुटवल इजलासले लामिछानेलाई थुनामुक्त गर्न दिएको आदेशप्रति सम्मान व्यक्त गर्दै विज्ञप्तिमा रास्वपा विधिको शासन, कानुनी सर्वोच्चता र न्यायिक प्रक्रियाप्रति सधैं प्रतिबद्ध रहेको उल्लेख गरिएको छ।
विज्ञप्तिमा सभापति लामिछानेमाथि लगाइएका मुद्दाहरू हाल यथावत् रहे पनि ती तत्कालीन निरंकुश सरकारले सुरु गरेको राजनीतिक प्रतिशोधको शृङ्खला भएको स्पष्ट भइसकेको दाबी गरिएको छ। पार्टीले वर्तमान नागरिक सरकारले आवश्यक कदम चाल्दै यस किसिमको राजनीतिक प्रतिशोधलाई पूर्णविराम दिने विश्वास व्यक्त गरेको छ।
साथै, राजनीतिक प्रतिशोधविरुद्ध निरन्तर खबरदारी गर्दै न्यायका पक्षमा उभिने देश–विदेशमा रहेका न्यायप्रेमी नेपाली, पार्टी सदस्य, समर्थक तथा शुभेच्छुकहरूप्रति पार्टीले आभार व्यक्त गरेको छ।
प्रकाशित मिति: शुक्रबार, पुस ४, २०८२
