काठमाडौं । नेकपा एमालेका अध्यक्ष केपी शर्मा ओलीले पार्टी नेतृत्वमाथि भौतिक आक्रमण वा जाली मुद्दा लगाउने प्रयास भए त्यसको कडा प्रतिवाद हुने चेतावनी दिएका छन्। उनले यस्तो अवस्था आए देश ठप्प पार्ने र सरकार ढाल्ने दाबीसमेत गरे।
बिहीबार काठमाडौंमा आयोजित पार्टीको शपथग्रहण समारोहपछिको कार्यक्रममा सम्बोधन गर्दै अध्यक्ष ओलीले पञ्चायतकालीन दमनकारी अभ्यास फेरि दोहोर्याउने प्रयास भइरहेको आरोप लगाए। उनले त्यसविरुद्ध आन्दोलनका लागि तयारी अवस्थामा रहन कार्यकर्तालाई निर्देशन दिए।
‘प्रचारको हल्लामात्र होइन, अब भौतिक आक्रमण र जाली मुद्दामार्फत एमाले नेतृत्वमाथि प्रहार गर्ने पञ्चायतकालीन कूकर्मको पुनरावृत्ति गर्ने प्रयास भइरहेको छ,’ ओलीले भने।
एमालेलाई छोए त्यसको परिणाम गम्भीर हुने भन्दै उनले चेतावनी दिए, ‘एमाले नेतृत्वमाथि हात हालिएको दिन देश ठप्प हुनुपर्छ। यो सरकार ढल्नुपर्छ र ढल्नेछ।’
अध्यक्ष ओलीले एमाले नेतृत्वमाथि जाइलाग्नु महँगो पर्ने दाबी गर्दै आन्दोलनलाई शब्दमा सीमित नराखी व्यवहारमै देखाउनुपर्ने बताए। ‘एमालेलाई छुनु संसारमै सबैभन्दा महँगो पर्छ। यसका लागि कुराले होइन, कामले तयार हुनुपर्छ,’ उनले भने।
प्रकाशित मिति: बिहीबार, पुस ३, २०८२
