काठमार्डौ ।नेकपा (एमाले)को सचिवालय बैठकमा पदाधिकारी संख्या १९ पुर्याउने अध्यक्ष केपी शर्मा ओलीको प्रस्ताव वरिष्ठ उपाध्यक्ष ईश्वर पोखरेल पक्षले कडा रूपमा विरोध गरेपछि रोकिएको छ।
शुक्रबार च्यासलस्थित पार्टी केन्द्रीय कार्यालयमा चार घण्टाभन्दा बढी चलेको सचिवालय बैठकमा अध्यक्ष ओलीले हालै मात्र गरिएको विधान संशोधन उल्ट्याउँदै पदाधिकारी विस्तार गर्ने प्रस्ताव अघि सारेका थिए। तर वरिष्ठ उपाध्यक्ष पोखरेलसहित छ नेता उक्त प्रस्तावको विरोधमा उभिएका थिए।
सचिव योगेश भट्टराईका अनुसार ओलीले उपाध्यक्ष संख्या पाँच र सचिव संख्या नौ बनाउँदै १९ पदाधिकारी राख्ने सुझाव दिएका थिए। ‘तर आन्तरिक विवाद समाधानका नाममा ल्याइएको प्रस्ताव स्वीकार्य नभएको भन्दै हामीले अस्वीकार गर्यौं,’ उनले भने।
विरोधपछि अध्यक्ष ओली पछि हटे र विधान अधिवेशनले पारित गरेको १५ पदाधिकारीको संरचना यथावत रहने निर्णय बैठकले टुंग्यायो। गत भदौमा सम्पन्न दोस्रो विधान महाधिवेशनले दशौँ महाधिवेशनमा रहेका १९ पदाधिकारी घटाएर तीन उपाध्यक्ष, एक महासचिव, तीन उपमहासचिव र सात सचिव कायम गरेको थियो।
तेस्रो कार्यकालका लागि अध्यक्षमा प्रत्याशी बन्न तयारी गरेका वरिष्ठ उपाध्यक्ष ईश्वर पोखरेललाई छ जना पदाधिकारीले समर्थन गरेका छन्। उनले केही दिनअघि आफ्नो अवधारणा पत्र महासचिव शंकर पोखरेललाई बुझाएका थिए। उक्त डकुमेन्ट महाधिवेशन प्रतिनिधिहरूलाई वितरण गर्ने सहमति पनि सचिवालय बैठकमा भएको भट्टराईले बताए।
उनका अनुसार, ईश्वर पोखरेलले अध्यक्ष पदमा दाबी गर्ने क्रममा महाधिवेशन हलमै आफ्नो अवधारणा राख्ने वातावरण मिलाइएको छ।
प्रकाशित मिति: शुक्रबार, मंसिर २७, २०८२
