काठमाडौं। काठमाडौं महानगरपालिका कार्यालयमा आज पनि कवाड व्यवसायीको आन्दोलन जारी रह्यो। विभिन्न पाँच बुँदे मागसहित आन्दोलनरत व्यवसायीहरूले कार्यालयको वरिपरि घेराबन्दी गरेका थिए। उनीहरूले संविधानले दिएको पेशा व्यवसाय गर्ने अधिकार सुनिश्चित गर्नुपर्ने र आफ्नो पेशाप्रति भइरहेको दमन तत्काल रोक्नुपर्ने माग राखेका छन्।
कवाड व्यवसायी, संकलक तथा मजदुरमाथि काठमाडौं महानगरपालिकाद्वारा गरिएको कुटपिट, अपहरण र संरचना भत्काउने जस्ता कार्यहरू रोकिनुपर्ने उनीहरूको प्रमुख माग हो। साथै, घटनामा संलग्न प्रहरीले कानुनी कारबाहीको सामना गर्नुपर्ने र विगत दुई वर्षमा भएको क्षतिको क्षतिपूर्ति तुरुन्त उपलब्ध गराउन सरकारसँग उनीहरूले माग गरेका छन्।
आन्दोलनरत व्यवसायीहरूले हिजो सोमबार पनि कमलादीस्थित महानगर कार्यालय बाहिर नाराबाजी र धर्ना दिएका थिए। आजको आन्दोलनमा सुरक्षा कडा पारिएको छ र प्रहरीले कार्यालय वरिपरि सुरक्षा व्यवस्था कडाइका साथ राखेको छ। व्यवसायीहरू आफ्नो माग पूरा नभएसम्म आन्दोलन जारी राख्ने सङ्कल्पमा छन्।
प्रकाशित मिति: मंगलबार, भदौ १०, २०८२
