काठमाडौं । हमासले नेपाली विद्यार्थी विपिन जोशीको मृत्यु भएको पुष्टि गरेको छ। जोशीसहित चारजना बन्धकको शव आजै रेडक्रसमार्फत इजरायललाई बुझाइँदैछ।
हमासको सैन्य शाखाले इ इलौज, योस्सी शराबी, बिपिन जोशी र डानियल पेरेत्सका शव हस्तान्तरण गर्न लागेको बीबीसीले जनाएको छ। इजरायली सेनाका अनुसार रेडक्रस टोली गाजातर्फ गइरहेको छ, जहाँ मृतक बन्धकहरूको कफिन रेडक्रसलाई हस्तान्तरण गरिनेछ।
हमासले आजै २० जना जिवित बन्धकहरूलाई पनि मुक्त गरेको बताइएको छ। इजरायली अधिकारीहरूले मृत्यु भएका बन्धकहरूको संख्या २८ जना सम्म हुनसक्ने बताएका छन्।
विपिन जोशी सन् २०२३ अक्टोबर ७ मा हमासको इजरायलमाथिको आक्रमणपछि बन्धक बनेका थिए। उनी ‘लर्न एन्ड अर्न’ कार्यक्रमअन्तर्गत अध्ययनका लागि इजरायलको किबुज अलुमिममा कार्यरत नेपाली विद्यार्थीमध्येका एक थिए।
उक्त आक्रमणमा १० जना नेपाली विद्यार्थीको मृत्यु भएको थियो भने विपिन मात्र बन्धकका रूपमा लगिएका थिए। त्यसको करिब एक महिनापछि, नोभेम्बर १७ मा गाजाको अल शिफा अस्पतालमा विपिनलाई देखिएको ३३ सेकेन्डको भिडियो सार्वजनिक भएको थियो।
विपिनको सकुशल उद्धारका लागि नेपाल सरकारले कूटनीतिक प्रयास जारी राखेको थियो। तत्कालीन प्रधानमन्त्री पुष्पकमल दाहाल ‘प्रचण्ड’ र परराष्ट्रमन्त्री एनपी साउदले कतारसहित विभिन्न देशमार्फत पहल गरेका थिए। राष्ट्रपति रामचन्द्र पौडेलले समेत कतारका अमिरसँगको भेटमा विपिनको रिहाइका लागि आग्रह गरेका थिए।
तर, ती सबै प्रयासहरू सफल हुन सकेनन्। आज हमासले विपिन जोशीको मृत्यु पुष्टि गर्दै उनको शव अन्य तीन बन्धकसँगै इजरायललाई बुझाउने तयारी गरेको छ।
जोशीका बुबा महानन्द र आमा पद्मा जोशीले छोराको उद्धारका लागि नेपाल सरकारसँग निरन्तर आग्रह गर्दै आएका थिए। अब भने उनीहरूको आशा समाप्त भएको छ।
प्रकाशित मिति: सोमबार, असोज २७, २०८२
