काठमाडौं । पोखरा क्षेत्रीय अन्तर्राष्ट्रिय विमानस्थलको लागत बढाएर सम्झौता गरिएको दाबीसम्बन्धी भ्रष्टाचार मुद्दामा विशेष अदालतले निलम्बित महानिर्देशक प्रदीप अधिकारी र पूर्वनिर्देशक मुरारी भण्डारीलाई धरौटीमा रिहा गर्ने आदेश दिएको छ।
अदालतका अध्यक्ष न्यायाधीश सुदर्शनदेव भट्ट र सदस्य न्यायाधीश डिल्लीरत्न श्रेष्ठको संयुक्त इजलासले अधिकारीलाई ५ लाख रुपैयाँ र भण्डारीलाई १ लाख रुपैयाँ धरौटी तोकेर तारेखमा राख्ने आदेश गरेको हो।
निलम्बित महानिर्देशक अधिकारी भने भक्तपुर नलिञ्चोक हेलिपोर्ट सम्बन्धी अर्को भ्रष्टाचार मुद्दामा पुर्पक्षका लागि थुनामा रहेका कारण यस प्रकरणको धरौटी नतिरिएको विशेष अदालतका सूचना अधिकारी यज्ञराज रेग्मीले जानकारी दिएका छन्। पूर्वनिर्देशक भण्डारीले भने तोकिएको एक लाख रुपैयाँ धरौटी बुझाएर रिहा प्रक्रिया पूरा गरेका छन्।
प्रकाशित मिति: मंगलबार, मंसिर २४, २०८२
