काठमाडौं । गुरु पूर्णिमाको अवसरमा अभिनेता तथा निर्माता दीपकराज गिरीले आफ्नो जीवनको निर्णायक मोडसँग जोडिएको संस्मरण सार्वजनिक गरेका छन्। सन् २०५३ तिर अमेरिका जान लागेका गिरीलाई निर्देशक तथा हाल चलचित्र विकास बोर्डका अध्यक्ष दिनेश डीसीले विदेश जानबाट रोकेका रहेछन्। यही सम्झनामा गिरीले डीसीलाई ‘गुरु’ मानेर सामाजिक सञ्जालमार्फत श्रद्धाञ्जलि अर्पण गरेका हुन्।
उनले लेखेका छन्, “तिमी कलाकार मात्रै भएको भए म जानै भनिदिन्थेँ, तर तिमीभित्र लेखकको प्रतिभा देखेँ। त्यसैले नेपालमै बस्दा तिमीले धेरै गर्न सक्छौ।” डीसीका ती शब्दहरूले उनलाई अमेरिका जान रोक्दै नेपाली मनोरञ्जन क्षेत्रमा नै संघर्ष गर्न हौसला दिएको उनले उल्लेख गरेका छन्।
दीपकले थप लेखेका छन्, “त्यही एक निर्णयले मेरो जीवनको बाटो बद्लियो। आज म आफ्नै देशमा खुसीपूर्वक जीउन पाएको छु। मेरो सफलता र पहिचानमा दिनेश दाइको भूमिका अपूरणीय छ।”
गुरु पूर्णिमाको सन्दर्भमा गिरीले डीसीसँगै रेडियो नेपालमा अभिनय सिकाउने मदनदास श्रेष्ठ, स्वर्गीय दीपक कोइराला र बासुदेव मुनाललाई पनि सम्झेका छन्। साथसाथै ध्यान र अनुशासन सिकाउने गुरू आनन्द बिनोदलाई विशेष रुपमा कृतज्ञता व्यक्त गरेका छन्।
दीपकराज गिरीको टेलिभिजन यात्रा ‘ट्वाक्क टुक्क’ कार्यक्रमबाट सुरु भएको थियो, जसको निर्देशन पनि डीसीले गरेका थिए। पहिलो पटक रेडियो कान्तिपुरमा जागिरको अवसर पनि डीसीकै पहलमा मिलेको थियो। स्क्रिप्ट लेखनदेखि ‘छक्का पञ्जा’ सिरिजको पहिलो फिल्मसम्मको यात्रामा पनि डीसीको संलग्नता रहेको उनले स्मरण गरेका छन्।
हाल दीपक नयाँ फिल्मको तयारीमा छन् र आइएनआई फिल्म हलका सञ्चालकसमेत रहेका छन्। उनले अभिनय मात्र होइन, पटकथा, निर्देशन र निर्माणमा समेत आफूलाई समाहित गर्दै आएका छन्।
गुरुको समयमै प्राप्त मार्गदर्शनले जीवनको दिशा फेरिने गिरीको कथा धेरैका लागि प्रेरणादायी बन्नसक्छ।
प्रकाशित मिति: शुक्रबार, साउन ३, २०८२
