काठमाडौँ । विश्व बैँकको सहयोगमा सञ्चालनमा आउन लागेको मुग्लिन नारायणगढ सडक बिस्तार सम्बन्धी परियोजनामा सेटिङबाट काम दिन थालिएको समाचार आजको न्युजले सार्वजनिक गरेपछि त्यसबारेमा छानविन भइरहेको छ । यसअघि मन्त्री रेणु यादवले त्यस्तो बदमासी देखिएको खण्डमा छानविन हुने बताएको भएपनि छानविन प्रक्रिया ढिलो भएको बारे आजको न्युजले जानकारी माग्दा आयोजनाका निर्देशक रामहरी पोखरेलले वान बाइ वान छानविन गर्न पर्ने भएकाले सबै करेक्सन गरिने बताएका हुन ।
आयोजना प्रमुख पोखरेलले भने : यो मेरो पनि अन्तराष्ट्रिय मूल्याङ्कनमा पहिलो अनुभव हो । तपाईंले उल्लेख गरेझैँ नेपाली कम्पनीहरू ब्याकअपमा रहेका हुन्छन तर यसको नम्बर पाउने प्रतिस्पर्धामा भने विदेशी कम्पनीले मात्रै भाग लिइरहेका हुन्छन् । नेपाली कम्पनीले यसमा के कस्तो सेटिङको वातावरण सिर्जना गरेको छ त्यो भने आफूले अहिलेनै भन्न नसक्ने पोखरेलको भनाई थियो ।
पोखरेलका अनुसार प्राविधिक प्रस्ताव सार्वजनिक गरी आर्थिक प्रस्ताव खुल्ला गर्ने मात्र कार्य मात्र भएको र अन्तिम मूल्यांकन हुन बाकी नै छ। अन्तिम छनौट गरिसके पछि मात्रै आशय पत्र प्रदान गरिने पोखरेलले बताएका छन् । पोखरेलले भने : हामीले अहिले एक एक छानविन गरिरहेका छौ । यसमा विश्व बैंक पनि संलग्न भएको हुनाले हामीको मात्रै छानबिनले चित्त नबुझे दातृसंस्थाले पनि छानविन गर्न सक्नेछ ।
पोखरेलका अनुसार आशय पत्र प्रदान गरिसकेपछि उजुरी लगायतका लागि १५ दिनको समय प्रदान गरिनेछ । खासमा त्यो बेला उजुरी गर्नुपर्ने भएपनि प्राविधिक प्रस्तावमा पछि परेकाहरूले समयभन्दा छिट्टै केही फर्महरूले उजुरी गरेका छन् । जे जस्तो भएपनि यसबारेमा आयोजना मात्रै होइन र विभाग र मन्त्रालयले समेत एक एक छानविन गरि त्रुटि भेटिए सच्याउने काममा आफूहरू प्रतिबद्ध भएको पनि पोखरेलले आजको न्युजलाई बताएका छन् । आफूहरूले निष्पक्ष मूल्यांकन गरेको भएपनि कँही कतै त्रुटी भए त्यो प्रस्तावनै रद्द गर्न समेत सकिने समय वाकिनै रहेको पोखरेलले बताएका छन् । यद्यपी आफूलाई चित्त नबुझे कुनैपनि कम्पनीले छानविनको माग गर्न पाउने पोखरेलले बताएका छन् ।
यसअघि सडक बिस्तार गर्ने यो परियोजनामा मिलेमतोमा काम दिन सेटिङ भइरहेको भन्दै आजको न्युजले तथ्यसहित विषयहरू सार्वजनिक गरेको थियो । यसअघि आजको न्युजले प्राविधिक प्रस्तावमा एक नम्बरमा पारिएको टीएमएस–ईटेकोबाट प्रस्ताव गरिएको दुईजना जनशक्तिहरुको योग्यताको व्यक्तिगत विवरण अर्थात बायोडाटानै झुटो रहेको पाइएपछि यसविरुद्ध आयोजना कार्यालय र मन्त्री रेणु यादव समक्ष लिखित निवेदनमै पेश भएको तथ्य सार्वजनिक गरेको थियो । टिएमएस–ईटेकोलाई नै मिलेमतोमा काम दिन यो सबै प्रपञ्च रचिएको र प्रतिस्पर्धाको नाटक मात्रै गरिएको भनेर पुष्टी गर्ने अर्को महत्वपूर्ण प्रमाण भनेको मूल्यांकन विधिमा वातावरण विज्ञको मूल्यांकन बिधिनै परिवर्तन गरिएको छ । आयोजनाका तर्फबाट आरएफपी माग्दा सडकै सडकको आयोजनामा काम गरेको अनुभवलाई मात्रै मूल्यांकनको विधि बनाउने भनिएको भएपनि पछि प्रस्ताव खुल्ला गर्दै गर्दा मुल्यांकन बिधि आफु खुसी परिवर्तन गरि अन्य क्षेत्रको अनुभवलाई पनि मूल्यांकनको आधार मानिएको देखिन्छ । जुन सरासर अख्तियारको दुरुपयोग हो र यसरी मिलेमतो गरि काम दिन खोज्नु भ्रष्टाचार हो भनी आजको न्युजले प्रमाण सहित अघिल्लो शृङ्खलामा विषय उजागर गरेको थियो ।
प्रकाशित मिति: शुक्रबार, मंसिर २४, २०७८
-1732776560.jpg)
