काठमाडौं । मुलुकमा उत्पन्न असामान्य अवस्थाबारे नेकपा एमालेले राष्ट्रपति रामचन्द्र पौडेललाई सक्रिय भूमिका लिन आग्रह गरेको छ ।
पार्टीका महासचिव शंकर पोखरेलद्वारा जारी विज्ञप्तिमा संविधानको मर्मअनुरूप सबै पक्षसँग सार्थक संवाद आरम्भ गर्नुपर्ने र त्यसमा राष्ट्रपतिले नेतृत्वदायी जिम्मेवारी लिनुपर्ने उल्लेख छ ।
‘सुशासन, नातावादको अन्त्य, तीव्र विकास र रोजगारी सिर्जना जस्ता युवापुस्ताका सरोकारलाई सम्बोधन गर्ने उपाय तत्काल खोजिनुपर्छ,’ विज्ञप्तिमा भनिएको छ ।
जेन–जेड आन्दोलनका क्रममा देखिएका आगजनी, तोडफोड र लुटपाट घटनामा आफ्नो पार्टीको कुनै संलग्नता नरहेको एमालेले प्रष्ट पारेको छ । यस्ता गतिविधिमा संलग्नलाई छानबिन गरेर कानुनी कारबाहीमा ल्याउनुपर्नेमा पनि पार्टीको जोड छ ।
साथै, ठूलो विनाश रोक्न सुरक्षा निकायहरू किन प्रभावकारी हुन नसकेको विषयमा गम्भीर समीक्षा आवश्यक रहेको एमालेले उल्लेख गरेको छ । स्थानीय तहले निर्वाध सेवा प्रवाह गर्न सक्ने वातावरण सुनिश्चित गर्न सरकारलाई समेत सचेत गराइएको छ ।
प्रकाशित मिति: बिहीबार, भदौ २६, २०८२
