काठमाडौं ।संघीय संसदले भदौ २३ र २४ गते भएको जेने–जेड (Gen-Z) आन्दोलनका क्रममा ज्यान गुमाउने नागरिकप्रति हार्दिक श्रद्धाञ्जली प्रकट गरेको छ। संसदले आन्दोलनका क्रममा घाइते भएकाहरूको उपचारमा कुनै कमी नहुने व्यवस्था मिलाउन सरकारलाई आग्रह पनि गरेको छ।
संयुक्त वक्तव्यमा संघीय संसद भवन, सिंहदरबारस्थित संसद सचिवालय लगायतका सरकारी कार्यालयहरूमा गरिएको तोडफोड, आगजनी र नष्ट गरिएको सम्पत्तिप्रति गम्भीर ध्यानाकर्षण गराइएको छ। यसले मुलुकलाई ठूलो क्षति पुगेको वक्तव्यमा उल्लेख छ।
राष्ट्रिय सभाका अध्यक्ष नारायण प्रसाद दाहाल र प्रतिनिधि सभाका सभामुख देवराज घिमिरेले हस्ताक्षर गरेको वक्तव्यमा संविधानवाद, विधिको शासन, नागरिक स्वतन्त्रता, राष्ट्रिय एकता र भौगोलिक अखण्डतालाई अडिग राख्दै संवैधानिक निकास खोज्न सबै पक्षलाई आह्वान गरिएको छ।
संसदले जनतालाई सबलीकरण गर्दै बलियो लोकतन्त्र निर्माणमा सहभागी हुन समेत आग्रह गरेको छ।
प्रकाशित मिति: शुक्रबार, भदौ २७, २०८२
