काठमाडौं । नेपाली कांग्रेसका महामन्त्री गगन थापाले पार्टी पुनर्गठनलाई अब अपरिहार्य भएको बताएका छन्।
उनले मत प्राप्त गर्नु र विश्वास कायम गर्नु फरक कुरा भएको भन्दै कांग्रेसले आत्मसमीक्षा गर्नुपर्ने आवश्यकता औंल्याए।
‘विशेषगरी नयाँ पुस्ताले हामीलाई रुचाएनन्, उनीहरू किन कांग्रेससँग छैनन् भन्ने प्रश्नको जवाफ खोज्नु मात्र होइन, व्यवहारिक काम पनि गर्नुपर्छ,’ थापाले भिडियो सन्देशमार्फत भने।
कांग्रेसको अनुहारमा लागेको दाग केवल ऐना पुछेर नहट्ने भन्दै उनले पार्टीलाई पुनःनिर्माण गर्नुपर्नेमा जोड दिए। ‘सिंगो देशसँग कांग्रेसले माफी माग्नुपर्छ, यो घाउलाई कांग्रेसकै नेतृत्वमा निको पार्नुपर्छ,’ उनले भने।
थापाले २३ र २४ भदौमा भएका अमानवीय र क्रुर घटनाको छानबिन गर्नुपर्ने माग गर्दै, नियतवश हिंसा गर्नेहरूलाई कानुनी दायरामा ल्याउन आग्रह गरे।
राष्ट्रपति, विभिन्न पार्टी र आन्दोलनकारीसँग निरन्तर संवाद भइरहेको बताउँदै उनले जेनजीले चाहेको नेतृत्वबारे पनि कांग्रेसले पहल गरिरहेको जानकारी दिए। ‘हामी सरकारलाई संविधानसँग जोड्न चाहन्छौं। संविधान एकपटक ट्र्याकबाट बाहिर गयो भने फर्काउन सकिँदैन,’ उनले चेतावनी दिए।
थापाले आज साँझसम्म नयाँ सरकार बन्ने विश्वास व्यक्त गरे।
प्रकाशित मिति: शुक्रबार, भदौ २७, २०८२
