काठमाडौं । अब जुनसुकै बैंकको एटिएमबाट पैसा निकाल्दा शुल्क नलाग्ने भएको छ ।
नेपाल राष्ट्र बैंकले शुक्रबार जारी गरेकाे मौद्रिक नीतिमार्फत जुनसुकै बैंकबाट पैसा निकाल्दा शुल्क नलाग्ने व्यवस्था मिलाएको हो।
यसअघि एक बैंकको एटिएम कार्डबाट अर्को बैंकको एटिमबाट पैसा निकाल्दा शुल्क लाग्ने गरेको थियो । तर, कोरोना भाइरसका कारण बैंकहरुले जुनसुकै बैंकको एटिएमबाट पैसा निकाल्दा शुल्क नलिने व्यवस्था गरेका थिए ।
अब भने सधैँका लागि एटिएमबाट पैसा झिक्दा शुल्क नलाग्ने व्यवस्था गरेको हो ।
यसैगरी अबदेखि एउटा बैंकमा खाता खोल्न ग्राहक पहिचान फारम भरिसकेपछि अर्को बैंकमा खाता खोल्दा फेरि फारम भर्नुनपर्ने भएको छ ।
राष्ट्र बैंकले परिपत्र गरेपछि यो व्यवस्था कार्यान्वयन हुने छ ।
यसैगरी राष्ट्र बैंकले कर्जाको ब्याज तिर्ने समय थप गरेको छ । कोरोना प्रभावित क्षेत्रहरुलाई ६ महिनादेखि असीमित अवधिसम्मका लागि कर्जाको सावाँ-ब्याज तिर्ने अवधि थप गरेको हो ।
मौद्रिक नीतिमार्फत् गरिएको व्यवस्थाअनुसार कर्जा चुक्ता गर्न २०७७ असार मसान्तसम्मको अवधि रहेकामा त्यसको म्याद २०७७ पुस, २०७७ चैत र २०७८ असार मसान्तसम्म कायम गरेको हो ।
यस्तै लघुवित्त वित्तीय संस्थाहरूले कर्जामा लिने ब्याजदरमा पनि राष्ट्र बैंकले अधिकतम सीमा तोकिदिएको छ ।
अब लघुवित्तले कर्जामा १५ प्रतिशतभन्दा बढी ब्याज लिने नपाउने व्यवस्था गरिएको छ ।
कोभिड-१९ को कारण ग्रेस अवधिभित्र उद्योग वा परियोजनाको निर्माण सम्पन्न/सञ्चालन हुन नसकेको अवस्थामा पर्यटक स्तरीय होटलको हकमा अधिकतम २ वर्ष, अति प्रभावित क्षेत्रमा प्रवाहित कर्जाको हकमा १ वर्ष, मध्यम प्रभावित क्षेत्रमा प्रवाहित कर्जाको हकमा ९ महिना र न्यून प्रभावित क्षेत्रमा प्रवाहित कर्जाको हकमा ६ महिनासम्मका लागि एक पटक ग्रेस अवधि थप गर्न सकिने व्यवस्था मिलाइने गभर्नर महाप्रसाद अधिकारीले जानकारी दिए ।
हेर्नुहाेस् माैद्रिक नीतिकाे पूर्ण पाठः
प्रकाशित मिति: शुक्रबार, साउन २, २०७७
-1732776560.jpg)
