नयाँ दिल्ली : भारतको संसदको तल्लो सदन लोकसभाका ५१ सिटका लागि आज पाँचौं चरणको निर्वाचन भइरहेको छ ।
जम्मू–कश्मीरदेखि मध्यप्रदेश र राजस्थानसम्मका सात राज्यमा मतदान भइरहेको छ ।
पाँचौ चरणको मतदानको दिन सोमवार मतदाताहरूले कांग्रेस पार्टीका अध्यक्ष राहुल गान्धी, यूपीए गठबन्धनकी प्रमुख सोनिया गान्धी, गृहमन्त्री राजनाथ सिंह, केन्द्रीय मन्त्री स्मृती ईरानी, राज्यवर्धन सिंह राठौर र महबूबा मुफ्ती जस्ता चर्चित नेताहरूको भाग्यको फैसला गर्दैछन् ।
यो चरणसँगै लोकसभाको ४ सय २५ सिटका लागि मतदान पूरा हुनेछ । सबै ५१ सिटहरूमा ६ सय ७४ उम्मेदवार चुनावको मैदानमा छन् ।
पाँचौं चरणको चुनावमा करिब ८.७५ करोड मतदाताले आफ्नो मताधिकार प्रयोग गर्दैछन्। ती मध्ये ४.६३ करोड मतदाता पुरुष छन् भने ४.१२ करोड मतदाता महिला रहेका छन् ।
चुनावको दिन अपांगता भएका र ज्येष्ठ नागरिक र अन्य अशक्त मतदाताहरूका लागि विभिन्न सुविधाहरू रहेको भारतीय निर्वाचन आयोगले जनाएको छ ।
चुनाव पर्यवेक्षण गर्ने एक संस्थाका अनुसार सोमवार चुनावी मैदानमा उत्रिएका उम्मेदवारहरू मध्ये १४ उम्मेदवारविरुद्ध गम्भीर आपराधिक मुद्दा लागेका छन् ।
सोमबार परीक्षा हुन लागेका उम्मेदवारहरू मध्ये २८ उम्मेदवार करोडपति छन् । ती उम्मेदवारहरूको औसत सम्पत्ति करिब २.५७ करोड रहेको बताइएको छ।
पाँचौ चरणमा सबैभन्दा धनी उम्मेदवारको सूचीमा पूनम सिन्हाको नाम सबभन्दा माथि छ । उनीसँग १ सय ९३ करोड रुपैयाँ भन्दा बढीको सम्पत्ति भएको उल्लेख छ ।
पूनम सिन्हा समाजवादी पार्टीको तर्फबाट लखनऊ लोकसभा क्षेत्रबाट चुनावी मैदानमा उत्रिएकी छन् । उनले सो क्षेत्रमा भाजपाका वरिष्ठ नेता राजनाथ सिंहलाई चुनौती दिँदै छिन् ।
प्रकाशित मिति: सोमबार, वैशाख २३, २०७६
-1732776560.jpg)
