एजेन्सी : भारतको उडिसा राज्यको तटवर्ती क्षेत्रमा शक्तिशाली समुद्री आँधी फानी प्रवेश गरेको छ ।
बंगालको खाडीमा बनेको सो समुद्री आँधी झन्डै २ सय किलोमिटर प्रतिघण्टाको वेगले अघि बढिरहेको छ । आँधीको प्रभावले शुक्रबार बिहानैदेखि वर्षा भइरहेको छ ।
फानी पूर्वोत्तर दिशातिर अघि बढ्दै गर्दा त्यसको असर नेपालमा समेत परेको छ । नेपालका विभिन्न क्षेत्रमा पानी परिरहेको मौसम पूर्वानुमान महाशाखाले जनाएको छ ।
भारतको मौसम विभागका अनुसार फानी बिहान आठ बजे जमिनमा आइपुगेको थियो । फानी उत्तर दिशातिर अघि बढ्ने र छ घण्टापछि शक्ति केही क्षीण हुँदा बलियो हावाहुरीको रूप लिन सक्ने बताइएको छ ।
फानीको सम्भावित मार्गमा पर्ने स्थानबाट झन्डै १० लाख मानिसलाई सुरक्षित स्थानमा सारिएको छ ।
नेपालमा फानीको प्रभावका कारण शुक्रवार दिउँसोदेखि पूर्वी र मध्य नेपालमा हावाहुरी आउने, चट्याङ पर्ने र वर्षा हुने सम्भावना रहेको मौसम पूर्वानुमान महाशाखाले जनाएको छ ।
पश्चिमी वायु पनि सक्रिय हुने देखिएकाले समुद्री आँधी फानी र पश्चिमी वायुका कारण देशैभरि वर्षा हुने महाशाखाको अनुमान छ । यस्तै हिमाली क्षेत्रमा हिमपातको सम्भावना छ ।
फानी र पश्चिमी वायुको प्रभाव शनिवारपछि कमजोर हुने र आइतवारदेखि मौसम सफा हुने महाशाखाको पूर्वानुमान छ ।
प्रकाशित मिति: शुक्रबार, वैशाख २०, २०७६
-1732776560.jpg)
