टोकियो । जापानका नयाँ सम्राट नारुहितोले विधिपूर्वक राज्यारोहण गरेका छन् । राज्यारोहणको औपचारिक र परम्परागत विधि सम्पन्न भएपछि पहिलो पटक सम्बोधन गर्दै उनले विश्वका जनताको सुख, देशको प्रगति र विश्वशान्तिको कामना गरेका छन् ।
बुवा आकिहितोले राजगद्दी परित्याग गरेको दिनको मध्यरातपछि जापानी राजसंस्थाका उत्तराधिकारी नारुहितो औपचारिक रूपमा सम्राट बनेका हुन् । बुधबार बिहान आयोजित विशेष समारोहमा सम्राट नारुहितोलाई उनका पूर्वजको नासो हस्तान्तरण गरिएको थियो ।
नारुहितो नयाँ सम्राट बनेपछि ‘रेवा’ नाम दिइएको नयाँ युग आरम्भ भएको छ । जापानी भाषामा रेवाको अर्थ सुव्यवस्था र सामन्जस्य हो । जापानमा सम्राट फेरिएपछि युग पनि फेरिने प्रचलन रहेको छ ।
५९ वर्षीय सम्राट नारुहितोले भावुक मन्तव्यमा आफ्ना बुवा आकिहितोप्रति कृतज्ञता व्यक्त गरे । आकिहितोले देशका सेवा गरेको उल्लेख गर्दै सम्राट नारुहितोले भने, ‘उहाँले आफ्नो कर्तव्य गम्भीरतापूर्वक ३० वर्षदेखि निर्वाह गर्नुभयो । उहाँले आफ्नो आचारबाटै ठूलो दयाभाव देखाउनुभयो । म उहाँप्रति हार्दिक सम्मान र प्रशंसा प्रकट गर्न चाहन्छु ।’
उमेर र स्वास्थ्यका कारण देखाउँदै ८५ वर्षीय आकिहितोले पदत्याग गरेका थिए । जापानी राजसंस्थाको इतिहासमा दुई सय वर्षपछि पहिलो पटक सम्राटले स्वेच्छाले पदत्याग गरेका हुन् ।
शाही निसान र छाप हस्तान्तरण गर्ने विशेष समारोह स्थानीय समयानुसार बिहान १०ः१५ मा सुरु भएको थियो । समारोहमा राजपरिवारका पुरुष सदस्य मात्रै उपस्थिति हुने प्रचलनअनुसार नयाँ साम्राज्ञी मासाको उपस्थित थिइनन् ।
जसमा नयाँ सम्राटलाई तरबारको एउटा प्रति र एउटा बहुमूल्य रत्न हस्तान्तरण गरिएको थियो । ती वस्तुलाई जापानी साम्राज्यको शक्तिको प्रतीक मानिन्छ र जापानको राजपरिवारमा पुस्तौँदेखि त्यसरी नै नयाँ सम्राटलाई दिइँदै आएको छ ।
उनलाई हस्तान्तरण गरिएको शाही खजानामा एउटा ऐना पनि छ । त्यसलाई सबैभन्दा महत्वपूर्ण मानिने सधैं एउटा मन्दिरमा राख्ने गरिएको छ ।
नारुहितो जापानका १२६ औं सम्राट हुन् । उनी २८ वर्षको उमेरमा राजसंस्थाको उत्तराधिकारी घोषित भएका थिए ।
प्रकाशित मिति: बुधबार, वैशाख १८, २०७६
-1732776560.jpg)
