कराकस : अमेरिकी विदेशमन्त्री माइक पोम्पेओले भेनेजुएलाका राष्ट्रपति निकोलास मदुरो क्युबा भाग्न तयार भएको दाबी गरेका छन् ।
विपक्षी नेता हुवाँ गुएइदोले विद्रोहको आह्वान गरेपश्चात् मंगलबार राष्ट्रपति मदुरो क्युबा निर्वासनमा जान तम्तयार भएको तथा विमानस्थलमा मदुरोलाई लैजान विमान तयारी हालतमा राखिएको दाबी गरे ।
तर रुसले उनलाई देश नछाड्न दबाव दिएको पोम्पेओको भनाई थियो । यसअघि अन्य अमेरिकी अधिकारीहरूले रक्षामन्त्री भ्लादिमिर पाद्रिनोसहित अन्य वरिष्ठ भेनेजुएलाली नेताहरूले मदुरोलाई हटाएर गुएइदोलाई समर्थन गर्न तयार भएको उल्लेख गरेका छन् ।
तर जनरल पाद्रिनोले मदुरोप्रति सेनाको समर्थन दोहो¥याएका छन् । भेनेजुएलाका विभिन्न सहरमा हजारौंले प्रदर्शन गरिरहेका बेला यस्तो खबर बाहिर आएको हो ।
मंगलबार दिनभरि प्रदर्शनकारी तथा सुरक्षा फौजबीच हिंसात्मक झडपहरू भएका थिए । सो क्रममा करीब १ सय घाइते भएका छन् ।
पश्चिमा देशको समर्थन गुएइदोलाई छ भने मदुरोको पक्षमा रुस, चीन र क्युबाजस्ता देश छन् । विपक्षी नेता गुएइदोले जनवरीमा संविधानको रक्षार्थ भन्दै आफैंलाई अन्तरिम राष्ट्रपति घोषणा गरेका थिए । त्यसयता भेनेजुएला राजनीतिक र आर्थिक संकटको भुमरीमा छ ।
प्रकाशित मिति: बुधबार, वैशाख १८, २०७६
-1732776560.jpg)
