लण्डन : बेलायतको मिडलसेक्स यूनिभर्सिटीले पाँचवटा कुकुरलाई ‘शिक्षणसहायक’ का रूपमा नियुक्त गरेको छ ।
ती कुकुरले विद्यार्थीहरूलाई परीक्षासम्बन्धी तनाव कम गर्न तथा तनावकै कारण विश्वविद्यालय छोड्ने जोखिम कम गर्न सहयोग गर्नेछन् । ल्याब्रडोर जातका ती कुकुरहरूलाई कर्मचारी परिचयपत्र दिइएको छ ।
विश्वविद्यालयमा कुकुरको व्यवस्थित प्रयोग गर्ने उद्देश्यसहित सञ्चालित एउटा योजनाअन्तर्गत उनीहरूलाई ‘विद्यार्थी कल्याण’ को काममा खटाइएको हो ।
विश्वविद्यालयको क्लिनिक सीप विभागकी प्रमुख फिओना सदर्स भन्छिन्, ‘तपाईँ साँच्चै तनावको मात्रा घटेको अनुभूति गर्न सक्नुहुन्छ ।’
उनी भन्छिन्, ‘यो गजबको कुरो हो र हामी जे गरिरहेका छौं त्यसलाई निरन्तरता दिन तथा विस्तार गर्न उत्सुक छौँ । कक्षाको एउटा कुनामा कुकुर बसिराख्दा पर्ने प्रभावबारे व्याख्या गर्न गाह्रो हुन्छ ।’
उनका अनुसार यो योजना सुरु गर्दा कसैलाई पनि यति सफल भइन्छ भन्ने लागेको थिएन ।
सबै कुकुरलाई विशेष तालिम दिइएको र परीक्षणपछि उनीहरूको स्वभाव ठिक भएको सुनिश्चित गरेर तिनलाई काममा खटाइएको सदर्स बताउँछिन् ।
गत महिना यूनिभर्सिटी अफ बकिंघमका उपकुलपति सर एन्थनी सेल्डनले विद्यालय तथा विश्वविद्यालयहरूमा तनाव घटाउने उपायका रूपमा कुकुरको प्रयोग गर्ने योजनालाई समर्थन गरेका थिए ।
उनले भनेका थिए, ‘हाम्रा विद्यालयमा मानसिक स्वास्थ्य सुधार गर्न र हाम्रा सन्तानलाई सुरक्षित अनुभूति गराउन हामीले गर्न सक्ने छरितो र ठूलो उपाय भनेको प्रत्येक विद्यालयमा कम्तीमा एउटा कुकुर राख्नु हो ।’ बीबीसी
प्रकाशित मिति: मंगलबार, वैशाख १७, २०७६
-1732776560.jpg)
