टोकियो : जापानी सम्राट आकिहितोले मंगलबार गद्दीत्याग गर्दै छन् । आकिहितो जापानी इतिहासमा पछिल्लो दुई सय वर्षमा गद्दीत्याग गर्ने पहिलो राजा हुन् । सन् १८१७ यता जापानको राजगद्दी स्वेच्छाले त्याग्ने उनी पहिलो सम्राट हुनेछन् ।
पचासी वर्षीय सम्राट आकिहितोले स्वास्थ्य र उमेरका कारण राष्ट्रप्रमुखको भूमिका निर्वाह गर्न असमर्थ भएको भन्दै गद्दीत्याग गर्ने घोषणा गरेका थिए । मंगलबार आकिहितोले गद्दीत्याग गरेपछि बुधबारबाट उनका छोरा नारुहितोले गद्दी सम्हाल्नेछन् ।
जापानी राजामा राजनीतिक र कार्यकारी अधिकार नभएपनि राष्ट्रिय प्रतीकका रुपमा सम्मानित छन् । टोकियोस्थित राजदरबारमा हुने समारोह टेलिभिजनबाट प्रत्यक्ष प्रसारण हुनेछ ।
सम्राट आकिहितोले गद्दीत्याग गरेपछि उनका छोरा नारुहितो जापानका १२६ औं सम्राट हुनेछन् । उनन्साठी वर्षीय नारुहितो २८ वर्षको उमेरमै युवराज घोषित भएका थिए ।
सन् १९८६ मा एक भोजका बेला उनले युवराज्ञी मासाकोलाई भेटेका थिए । उनीहरूको विवाह सन् १९९३ मा भयो । शाही दम्पतीको एक्लो सन्तानको रूपमा राजकुमारी आइको सन् २००१ मा जन्मिएइन् । तर जापानको वर्तमान कानुनले महिलालाई गद्दी आरोहण गर्न अनुमति दिँदैन ।
त्यसैले उनका काका राजकुमार फुमिहितो अबको उत्तराधिकारी हुनेछन् भने त्यसपछि फुमिहितोका छोरा हिसाहितो हुनेछन् ।
प्रकाशित मिति: मंगलबार, वैशाख १७, २०७६
-1732776560.jpg)
