मोसुल : चरमपन्थी संगठन इस्लामिक स्टेट (आईएस) का नेता अबु बकर अल बग्दादी पाँच वर्षपछि भिडियोमा देखिएका छन् ।
उनी सन् २०१७ मा नै आईएसविरुद्ध रुसी र इराकी फौजले गरेको भीषण कारबाहीमा मारिएको खबर बाहिर आएको थियो । तर त्यसको दुई वर्षपछि उनको भिडियो बाहिर आएको हो ।
अमेरिकाले पनि सन् २०१७ मा भएको एक आक्रमणमा उनी गम्भीर घाइते भएको र उनलाई महिनौंसम्म युद्धभूमिबाट पर लगिएको बताएको थियो ।
यसअघि सन् २०१४ मा पहिलो पटक बग्दादी भिडियोमा देखिएका थिए । बग्दादीको भिडियो सार्वजनिक भएलगत्तै अमेरिकाले आईएसलाई पूर्ण रुपमा सिध्याउने चेतावनी दिएको छ ।
अमेरिकी अधिकारीहरूले सो भिडिओ सन्देशको सत्यताबारे जाँच भइरहेको बताएका छन् । सिरिया र इराकमा आइएसले आफ्नो नियन्त्रणमा रहेको भूभाग गुमाए पनि आईएस विरुद्धको लडाइँ नसिकिएको प्रस्ट भएको अमेरिकी विदेश मन्त्रालयले बताएको छ ।
सो भिडिओमा अल बग्दादी भनि चिनाइएका व्यक्तिले सिरियामा मारिएकाहरूको बदलास्वरूप आफूहरूले आठ देशमा दर्जनौं आक्रमण गरेको उल्लेख गरेका छन् ।
श्रीलंकामा भएको शृंखलाबद्ध विस्फोटनको जिम्मा लिँदै उनले अझ लामो संघर्ष जारी रहेको बताएका छन् ।
प्रकाशित मिति: मंगलबार, वैशाख १७, २०७६
-1732776560.jpg)
