धनकुटा : एक सय रुपैयाँ अंकित दरले गुराँस लघुवित्त वित्तीय संस्थाले आजदेखि आईपीओ निष्काशन गरेको छ । दुई लाख ५० हजार कित्ताका लागि कुल दुई करोड ५० लाख रुपैयाँ बराबरको साधारण शेयर सर्वसाधारणका लागि निष्काशन गरेको हो । सेयरको निष्काशन तथा बिक्री प्रबन्धकको काम एनआईबीएल एस क्यापिटल लिमिटेडले गर्नेछ ।
लगानीकर्ताले १० देखि अधिकतम ५०० कित्तासम्मका लागि आवेदन दिन सक्नेछन् । गुराँस लघुवित्त कम्पनीका कर्मचारीका लागि तीन हजार ८७५ कित्ता, म्युच्युअल फण्डहरूका लागि १२ हजार ५०० कित्ता तथा सर्वसाधरणका लागि दुई लाख ३३ हजार ६२५ कित्ता छुट्याइएको छ ।
गुराँस लघुवित्त वित्तीय संस्थाको अधिकृत पुँजी १० करोड, जारी पुँजी सात करोड ७५ लाख र चुक्ता पुँजी पाँच करोड २५ लाख रुपैयाँ रहेको छ । त्यस्तै, शेयर निष्काशन बाँडफाँटपछि संस्थाको चुक्ता पुँजी सात करोड ७५ लाख रुपैयाँ हुनेछ ।
नेपाल राष्ट्र बैंकबाट ‘घ’ वर्गको इजाजतपत्र प्राप्त गरेको यस वित्तीय संस्थाले २०७३ मंसिर १३ गतेदेखि आफ्नो वित्तीय कारोबार सुरु गरेको हो ।
धनकुटा- ७, हुलाक टोलमा केन्द्रीय कार्यालय रहेको यस वित्तीय संस्थाले स्थापनाको छोटो अवधिमै आफ्नो कार्यक्षेत्र धनकुटा, तेह्रथुम, संखुवासभा, भोजपुर, ओखलढुङ्गा, ताप्लेजुङ, पाँचथर, इलाम, मोरङ र सुनसरी गरी १० जिल्लाभित्र २२ वटा शाखा कार्यालयमार्फत् ११ हजार बढी विपन्न वर्गका महिला तथा पुरुषहरूलाई समूहमा आबद्ध गरिसकेको छ ।
प्रकाशित मिति: सोमबार, वैशाख १६, २०७६
-1732776560.jpg)
