कोलम्बो : श्रीलंका सरकारले गत आइतबार राजधानी कोलम्बोमा रहेका विभिन्न चर्च तथा होटलहरुमा भएको आत्मघाती हमलामा मारिनेको संख्या घटाएको छ ।
यसअघि सो विस्फोटमा परी ३ सय ६० जनाको मृत्यु भएको बताइएको थियो । मृतकहरूको गणनामा गल्ती भएको भन्दै स्वास्थ्य मन्त्रालयले सो घटनामा परि दुई सय ५३ जनाले मात्र ज्यान गुमाएको जनाएको हो ।
श्रीलंका सरकारले पछिल्लो समयमा दिएको मृतकहरूको संख्या पहिलेको तुलनामा करिब एक सयले कम हो । एकजना अधिकारीले मानव शरीरका धेरै अवशेषहरूले गर्दा मृतकको संख्या गणनामा कमजोरी हुन गएको बताएका छन् ।
यो घटनामा परी धेरैजसो श्रीलंकाली र विदेशी नागरिकहरु समेत रहेका छन् ।
सो घटनामा करिब ५ सय घाइते भएका छन् । नौ जना व्यक्तिहरू यो हमलामा सामेल रहेको आशंका गरिएको छ । प्रहरीले आक्रमणकारीहरूसँग निकट रहेकाहरूको खोजी जारी राखेको छ ।
आक्रमणकारीसँग सम्पर्कमा रहेका खोजी भइरहेका सात जनाको तस्बिर पनि प्रहरीले सार्वजनिक गरेको छ ।
अधिकारीहरूले श्रीलंकाको एउटा अतिवादी इस्लामिक समूहलाई सो घटनाका लागि दोष दिइरहेको छ ।
इस्लामिक स्टेट्सले सो घटनामा आफ्नो हात रहेको बताए पनि हालसम्म त्यसको पुष्टी हुने प्रर्याप्त प्रमाणहरू भेटिएका छैनन् ।
श्रीलंकामा भएको यो भीषण हमलापछि त्यहाँका अल्पसंख्यक मुस्लिमहरूमा उत्पीडन भोग्नुपर्ने डर पैदा भएको खबरहरू आएका छन् ।
श्रीलंकाका कट्टरपन्थी मुस्लिहरूले धर्म विरोधी ठान्ने गरेको अहमदी सम्प्रदायका सयौं मानिसहरूलाई प्रहरीको सुरक्षामा मस्जिदहरूमा राखिएको छ ।
प्रकाशित मिति: शुक्रबार, वैशाख १३, २०७६
-1732776560.jpg)
