मड्रिड । स्पेनको राजधानी मड्रिडमा रहेको उत्तर कोरियाली दूतावासमा छापा मार्ने समूहमा संलग्न भएको आरोपमा अमेरिकी मरिन कोरका एक सैनिक पक्राउ परेका छन् ।
क्रिस्टोफर आन नामक ती सन्दिग्ध व्यक्तिलाई लस एन्जलसस्थित अदालतमा पेस गरिने बताइएको छ । गत फेब्रुअरी महिनामा अमेरिकी राष्ट्रपति डोनल्ड ट्रम्प र उत्तर कोरियाका नेता किम जङ–उनबीच भियतनाममा शिखरवार्ता हुनुभन्दा केही दिनअघि सो घटना भएको थियो ।
सो घटनामा संलग्नताको आरोपमा पक्राउ गरिएका उनी पहिलो व्यक्ति हुन् । स्वघोषित मानवाधिकारवादी समूह ‘फ्री जोस–अन’ ले सो घटनामा संलग्न भएको दाबी गरेको थियो । अमेरिकी संघीय अधिकारीले सो समूहका एक अगुवा एड्रिअन हङको घरमा पनि छापा मारेको वाशिंटन पोस्टले जनाएको छ ।
त्यस घटनामा एक सहचारीसहित दूतावासका अन्य अधिकारीहरूलाई नियन्त्रणमा लिइएको थियो । ती सहचारीलाई उनीहरूले आफू दोषी रहेको जबरजस्ती स्वीकार गराउने प्रयास गरेका थिए । सो समूहका सदस्यहरूले कम्प्युटर र हार्ड ड्राइभ बन्द गरिदिएको र तिनमा संकलित डेटा लिएर अमेरिकी अधिकारीहरूलाई पठाइएको आरोप लागेको छ ।
प्रकाशित मिति: शनिबार, वैशाख ७, २०७६
-1732776560.jpg)
