खार्तुम : सुडानको सैनिक परिषद्ले पूर्ववर्ती सरकारका सदस्यहरूलाई पक्राउ गरेको छ । यस्तै परिषदले हप्तौंदेखि प्रदर्शन गरिरहेका प्रदर्शनकारीलाई तितरबितर नपार्ने प्रतिबद्धता पनि जनाएको छ ।
परिषद्का प्रवक्ताले विपक्षीहरूलाई नयाँ प्रधानमन्त्री छान्न आग्रह गर्दै त्यसलाई कार्यान्वयन गर्ने जनाएका छन् । महिनौंदेखिको प्रदर्शनबीच गत बिहीबार राष्ट्रपति ओमार अल–बशीरलाई पदच्युत गरी पक्राउ गरिएको थियो ।
गैरसैनिक सत्ताका लागि तत्काल कदम नचालिएसम्म सडक प्रदर्शन जारी राख्ने प्रदर्शनकारीको अडान छ । परिषद्का प्रवक्ता मेजर जेनरले शम्स अद्दिन शान्तोले गैरसैनिक सरकार र विपक्षी दलहरूले गर्ने जुनसुकै सहमति कार्यान्वयन गर्न परिषद् ‘तयार रहेको’ बताएका छन् ।
विपक्षी र प्रदर्शनकारी समूहतर्फ इंगित गर्दै उनले भने, ‘हामीले प्रधानमन्त्री नियुक्त गर्नेछैनौं । उनीहरूले नै चयन गर्नेछन् ।’ सेनाले बल प्रयोग गरी प्रदर्शनकारीहरूलाई धर्नाबाट नहटाउने पनि उनले बताए ।
तर मानिसहरूको सामान्य दैनिक सुरू गर्न दिन र सडक अवरोधहरू हटाउन प्रदर्शनकारीलाई आग्रह गरेका छन् ।
यस्तै सेनाले सेना, प्रहरी र गुप्तचर निकायका प्रमुख नियुक्त गरेको छ । यस्तै भ्रष्टाचारविरुद्ध लड्न र पूर्वसत्तारुढ पार्टीबारे अनुसन्धान गर्न समितिहरू गठन, सञ्चारमाध्यममाथि लगाइएका प्रतिबन्ध फुकुवा, प्रदर्शनकारीलाई सघाएको आरोपमा पक्राउ गरिएका प्रहरी तथा सुरक्षा अधिकारीहरू रिहा, कूटनीतिक निकायको समीक्षा, अमेरिका र स्विट्जरल्यान्डका लागि राजदूत बर्खास्त समेत गरेको छ ।
प्रकाशित मिति: सोमबार, वैशाख २, २०७६
-1732776560.jpg)
