वासिंगटन : अमेरिकी राष्ट्रपति डोनाल्ड ट्रम्पले इरानको सेना रिभोल्युसनरी गार्ड कोर (आईआरजीसी) लाई विदेशी आतंकवादी संगठन घोषित गरेका छन् ।
अमेरिकाले कुनै पनि देशको राष्ट्रिय सेनालाई आतंकवादी संगठन घोषणा गरेको यो पहिलो घटना हो । अमेरिकाले आईआरजीसीको उद्देश्य विश्वव्यापी आतंकवादी अभियानलाई लागू गर्नु रहेको आरोप लगाएको छ ।
अमेरिकाको यो कदम लगत्तै इरानले पनि मध्यपूर्वमा रहेका अमेरिकी सैनिकलाई आतंकवादी घोषणा गरेको छ । गत वर्ष ट्रम्पले इरानसँगको परमाणु सम्झौता रद्द गरेका थिए ।
अमेरिकाको यो कदम कुनै तर्कमा आधारित भन्दा पनि इरानलाई अन्तर्राष्ट्रिय समुदायमा होच्याउनु र उसको अर्थतन्त्रलाईै तहसनहस पार्ने मनसायबाट आएको देखिएको भन्दै आलोचना भएको छ ।
ट्रम्पले आफ्नो कदमले इरानमाथि अहिलेभन्दा बढी दबाव पर्ने बताएका छन् । इरानमाथि अमेरिकाले लगाएका प्रतिबन्ध आगामी साताबाट लागू हुने विदेश मन्त्रालयले जनाएको छ ।
सन् १९७१ मा इरानमा भएको क्रान्तिपछि त्यहाँ रेभोलुशनरी गार्डको गठन भएको थियो । यो इरानका सर्वोच्च नेता आयोतुल्लाह अलि खामेनीको निर्णय थियो ।
तर पेन्टागनका केही अधिकारीहरूले अमेरिकाले इरानको फौजलाई आतंकवादी घोषित गरेपछि अमेरिकी फौजको सुरक्षाबारे चिन्ता व्यक्त गरेका छन् ।
सेनाका अधिकारीहरूले यसरी आतंकवादी भनी घोषणा गर्दा त्यसले मध्यपूर्वमा रहेका अमेरिकी फौजविरुद्ध हिंसा निम्तिन सक्ने चेतावनी दिएका छन् ।
देशको केन्द्रीय गुप्तचर निकाय पनि ट्रम्पको पछिल्लो कदमको विपक्षमा रहेको बताइएको छ ।
अमेरिकाको पछिल्लो घोषणाको प्रतिक्रिया दिँदै इरानको राष्ट्रिय सुरक्षा परिषद्ले अमेरिकाको सेन्ट्रल कमान्डलाई आतंकवादी संगठन भनेको छ । सेन्ट्रल कमान्डले खासगरी अफगानिस्तान, इराक, इरान, पाकिस्तान र सिरियामाथिको वाशिंगटनको सुरक्षा चासोलाई हेर्ने गर्छ ।
प्रकाशित मिति: मंगलबार, चैत २६, २०७५
-1732776560.jpg)
