वासिंगटन : डोनाल्ड ट्रम्प अमेरिकी राष्ट्रपति भएपछि उनले नियुक्त गरेका मन्त्रीहरुको राजीनामा र हेरफेरको क्रम अझै रोकिएको छैन । एक पछि अर्को गर्दै ट्रम्प प्रशासन छाड्नेको सूचीमा अब गृह सुरक्षासचिव पनि थपिएकी छन् ।
गृह सुरक्षासचिव कर्स्टजेन नीलसनले आफ्नो पदबाट राजीनामा दिएको राष्ट्रपति ट्रम्पले जानकारी दिएका छन् ।
उनले कर्स्टजेन नीलसनलाई उनको सेवाका लागि धन्यवाद दिएका छन् । तर यो राजीनामाका विषयमा उनले थप केही उल्लेख गरेका छैनन् । दक्षिणी सीमानामा आउने आप्रवासी रोक्न असफल भएको भन्दै नीलसनप्रति असन्तुष्टि व्यक्त भइरहँदा उनले राजीनामा दिएकी हुन् ।
अब यो जिम्मेवारी कस्टम एन्ड बोर्डर कमिस्नर केभिन म्याकअलीननले सम्हाल्ने छन् ।
नीलसनले आफ्नो राजीनामापछि सो विभागका काम गर्नु आफ्नो जीवनभरको सम्मान भएको उल्लेख गरेकी छन् । नीलसनले नै ट्रम्पको विवादित सीमा नीति लागू गराएकी थिइन् ।
राजीनामाको कारणबारे केही उल्लेख नगरेकी उनले यो आफ्ना लागि सही समय भएको उल्लेख गरेकी छन् । उनले आफूले पद सम्हालेको समयभन्दा अमेरिका अहिले बढी सुरक्षित रहेको बताएकी छन् ।
कर्स्टजेन नीलसन २०१७ मा ट्रम्प प्रशासनमा जोडिएकी थिइन् । उनलाई गृह सुरक्षा प्रमुख जोन केलीको सहायकको जिम्मेवारी दिइएको थियो । केलीले राजीनामा दिएपछि उनलाई सो विभागको प्रमुख बनाइएको थियो ।
प्रकाशित मिति: सोमबार, चैत २५, २०७५
-1732776560.jpg)
