काठमाडौं : ‘गङ्गादशहरा मेलामा जाऔँ, खप्तडका सुन्दर फाँटहरु घुमौँ, त्रिवेणीमा स्नान गरौँ’ भन्ने नाराका साथ गङ्गादशहरा मेला शुरु भएको छ । सुदूरपश्चिमको प्रमुख पर्यटकीयस्थल खप्तडमा प्रत्येक वर्ष जेठमा लाग्ने मेला यस वर्ष पनि भव्यरुपमा शुरु भएको हो ।
गङ्गादशहरा मेलाकै अवसर पारी डोटी उद्योग वाणिज्य सङ्घले बर्सेनी आयोजना गर्दै आएको खुला पुरुष भलिबल, घोडा दौड र सुदूरपश्चिमकै संस्कृतिका रुपमा चिनिएको देउडा प्रतियोगिता यस पटक पनि आयोजना गरेको उद्योग वाणिज्य सङ्घका अध्यक्ष मोहनबहादुर कलेलले जानकारी दिए ।
अध्यक्ष कलेलले खप्तडलाई देश–विदेशमा चिनाउन बर्र्सेनी विभिन्न आयोजना गर्दै आएका र सोही अनुसार यो वर्ष पनि विभिन्न कार्यक्रमको आयोजना गरेको बताए ।
उद्योग वाणिज्य सङ्घ डोटीका महासचिव दीपकबहादुर खड्काले हरेक वर्ष मेला भर्नका लागि स्वदेशी तथा विदेशी हजारौँ तीर्थालु तथा पर्यटकहरु आउने गरेको बताए ।
महासचिव खडकाले सुदूरपश्चिमको ‘भू–स्वर्ग’ को उपमाले चिनिँदै आएको खप्तडमा विशेषगरी आज (मंगलबार) रातभरि मेला लाग्ने देउडा खेल्ने तथा बुधबार बिहान पूजाआजा गर्ने चलन रहेको बताए ।
गङ्गादशहरा मेलाका दिन त्रिवेणीधाममा नुहाउँदा पाप नाश हुने, पितृलाई तर्पण दिँदा पितृले मुक्ति पाउने र स्वर्ग जाने, मनको इच्छा पूरा हुने जनविश्वास रहि आएको छ ।
सुदूरपश्चिमका चार पहाडी जिल्ला बाजुरा, बझाङ्ग, अछाम र डोटीको केन्द्र विन्दुमा पर्ने खप्तड नेपालकै सुन्दर पर्यटकीय क्षेत्रहरुमध्येको एक हो । खप्तड क्षेत्रमा आँखाले नभ्याउने विशाल फाँटहरु, हिउँदमा सेताम्मे र वसन्त ऋतुमा रङ्गीविरङ्गी फूलले छपक्कै छोपेका मैदानहरु रहेका छन् ।
२२ पाटन र ५२ झोती भनेर पनि चिनिने खप्तडमा खप्तड बाबाको कुटी, त्रिवेणी नदी, खप्पर दह, शिव मन्दिर, सहस्रलिङ्ग, गणेशस्थान, नागढुङ्गा, माइका थान, छिन्तेढुङ्गा, केदारढुङ्गा, डाँफेकोट, सीतापाइला, घोडादाउन पाटन, नाचन्थली, बलेमेला, पाटन जेठी बहुरानी ढुङ्गा, भलाउने पाटनजस्ता धार्मिकस्थलहरु रहेका छन् ।
प्रकाशित मिति: मंगलबार, जेठ २८, २०७६ १८:२१