पाल्पा : पाल्पाको निस्दी गाउँपालिकाका जङ्गलबाट ल्याइएको च्याउको तरकारी पकाएर खाएर बिरामी परेकामध्ये दुई जनाको ज्यान गएको छ ।
जङ्गली च्याउ पकाएर तरकारी खाएका निस्दी- ३ का ११ जना बिरामीमध्ये नौ वर्षका निर्मलासिंह ठकुरीको शनिबार तथा आज चार वर्षीय विष्णुसिंह ठकुुरीको मृत्यु भएको जिल्ला प्रहरी कार्यालय पाल्पाले जनाएको छ । बिरामीमध्ये अन्य नौ जनालाई थप उपचारका लागि भरतपुर चितवन सिफारिस गरिएको छ ।
नवलपरासीको मध्यविन्दु अस्पतालमा उपचार भइरहेका नौ जनाको मनकामना अस्पताल तथा पुरानो मेडिकल कलेज भरतपुरमा उपचार भइरहेको र अवस्था सामान्य रहेको जिल्ला प्रहरी कार्यालय पाल्पाका प्रहरी नायव उपरीक्षक कृष्णराज सापकोटाले जानकारी दिए । बिरामी ४५ वर्षीय पुरन खाम्चा, उनकी श्रीमती ३६ वर्षीया चनकुमारी, १५ वर्षीया छोरी विमला, ८० वर्षीय प्रेमसिंह ठकुरी, ३० वर्षीया दानमायासिंह ठकुरी, सात वर्षीय सुमनसिंह, धनकुमारी सिंह, निशासिंह र निरुतासिंहको अवस्था सुधारोन्मुख रहेको प्रहरीको भनाइ छ ।