–नवीन रायमाझी
केहि दिन अगाडि नयाँ शक्ति पार्टीको एउटा कार्यक्रममा आफुलाई नागरिक समाजको अगुवा भन्न रुचाउने डा. सुन्दरमणि दीक्षितले संविधान संशोधन नगरी चुनावमा नजान नेताहरुलाई कडा शब्दमा चेतावनी दिएको समाचार आएको थियो । प्रजातान्त्रिक देशमा सरकारलाई चेतावनी दिने हक डा. दीक्षित जस्ता महामानवदेखि यो पंक्तिकार जस्तो निम्छरो नागरिकसम्मलाई छ र त्यस्ता चेतावनीले केही माखो मर्ला वा कुनै समुहको कार्यक्रममा गएको समयमा उक्त समुहको हो मा हो मिलाउन गरेको बहुला हल्लामामात्र सीमित रहला त्यो समयले बताउनेछ । बहुदलीय व्यवस्थाको आगमन पछि समाज खुला भयो भनिन्छ तर मलाई लाग्छ समाज खुला भएको नभई निर्वस्त्र भएको हो । नियम कानुनले बाँधेको अवस्थामा जे पायो त्यो बोल्न नहुने तर अहिले जसले जे बोले पनि हुने भएर कुनै एउटा पेशामा नाम, दाम कमाएका र आफ्नो पेशामा माखो मार्न नसकेर असफल भएकाहरू रातारात नागरिक समाजको अगुवा र मानवअधिकारकर्मी भएर उम्रेका छन । यो पद कसले प्रदान गर्ने हो वा यो कुन युनिभसिर्टीमा अध्ययन गरे पश्चात पाइने हो त्यो आजसम्म मलाई र सम्भवतः कसैलाई पनि थाहा छैन ।
सिके राउत भन्ने पागलले देश टुक्राउने भाषण दिएर हिड्दा र भारतीय सैनिक देशभित्र आएर आफ्नो नागरिकलाई गोली ठोकेर मार्दा केही नबोल्ने । तर संविधानकाविरुद्ध बोल्ने व्यक्तिलाई प्रहरीले पक्राउ गर्दा तुरुन्त रिहा गर्नु पर्छ भनेर कुर्लने ? यी कथित अगुवा र अधिकारकर्मीहरुको कुरा कसैले पनि बुझ्न सक्दैन कमसेकम म जस्तो अपठितहरुले । ठाउँ ठाउँमा बिना मतलब भाषण गर्दै हिड्ने, केहि नभए ठीकै छ तर कुनै कारणले आफुलाई अफ्ठेरो प¥र्यो भने पत्रकारले अलि बंग्यायर लेखेछन भनेर उम्किने यस्ता मान्छेहरुले कुन ठाउँमा के बोल्यो र त्यो बोलेको कुरा कति सान्दर्भिक छ भनेर कुनै सोच विचार नै नगरी आफ्नो सञ्चार माध्यममा स्थान दिने पत्रकारहरुको पनि ठुलो गल्ती छ, यस्ता मान्छेहरुलाई विनाकाम ‘हाइलाइट’ गर्नुमा ।
सरकारको लाचारीले पनि यस्ता अगुवा र अधिकारकर्मीहरुको मनोवल वढेको हो । एउटा सामान्य नागरिकले बोल्यो भने कारबाही हुने तर स्वयम् घोषित अगुवा र अधिकारकर्मीले बोल्यो भने कुनै कारबाही नहुने । अझै फलानो ले त् क्या बोल्यो वा ढिस्कानो ले त कस्तो बोल्यो भनेर तारिफ हुँदा अहो मैले गरेको बकबकले त सर्वसाधारणमा प्रभाव पारेको रहेछ भनेर उनीहरुको मनोबल बढ्नगई अझै अर्को अर्को ठाउँमा मनपरी बोल्न थाल्छन । अत यस्ता स्व घोषित अगुवा र अधिकारकर्मीहरुलाई सरकार, नागरिक समाज र सञ्चारमध्यमले मात्र ठिक ठाउँमा ल्याउन सक्ने भएकोले यिनीहरुको सान्दर्भिक र असल कुराहरुमात्र सुन्ने र वेमतलबको कुराहरुलाई अस्विकार गरे यिनीहरुको छाडा कुरा सुन्न र पढ्न नपाएर म र म जस्ता व्यक्तिहरुलाई आराम हुने थियो ।
प्रकाशित मिति: आइतबार, फागुन २९, २०७३
-1732776560.jpg)
